உயிர்ப்பாங்கி நண்பேன் டா – 11

அத்தியாயம் 11

” இல்லை டா கண்ணா . டான்ஸ் கத்துக்க நீ தானே ஆசைப்பட்ட.”  என்றார் அப்பா ராஜன்.

அந்த வயதில் எனக்கு காரணம் சொல்ல தெரியலை . எனக்கு எப்போதும் அந்த டான்ஸ் கிளாஸ் போக பிடிக்காமல் இருந்தது . ஆனா என்னை சமாதானம் செய்து அனுப்பினார்கள் .

” மாஸ்டர் , சந்தியா எப்படி டான்ஸ் ஆடுறா ? ” என்றுக் கேட்டார் ராஜன்.

” இவ்வளவு சின்ன வயதில் சந்தியா ரொம்ப அருமையாக ஆடுற ” என்றான் அந்த மாஸ்டர் .

அப்பா போயிட்டாங்க  . எப்போதும் என்னை ஒரு மாதிரி பார்ப்பவர்‌. அன்னைக்கு என் கிட்ட தப்பாக நடக்க முயற்சி செய்தார் . அன்னைக்கு அந்த நேரம் அங்கு யாரும் இல்லை நான்  ரொம்ப பயந்தேன்.

என் நல்ல நேரம் . அப்பாவின் போனை காரில் வரும்போது விளையாடிட்டு வந்தேன் , தெரியாமல் என்னோட வாட்டர் பேக்கில் வெச்சிட்டேன் . அதை வாங்க வந்தவர்  , ” டேய் பொறுக்கி நாயே ”

என்று கத்தினார் . பின்னர் அவனை நல்லா  அடித்தார் .

” ஏன் டா இப்படி பண்ண . சொல்லுடா பொறுக்கி.” என்றுக் கேட்டார் அப்பா .

” பணத்துக்காக தான் சார் . வீடியோ எடுத்து உங்க கிட்ட பணம் வாங்க தான் ”  என்றான் அவன் .

அந்த நாளின் நினைவில் இருந்து வெளியே வந்த சந்தியா அழுதாள் . தீப்ஷீயின் கண்களிலும் கண்ணீர் .                ‘ பெண்களாக பிறந்த பாவத்திற்கு இன்னும் என்னென்ன அனுபவிக்க வேண்டுமோ ‘ என்று நினைத்த தீப்ஷீ , சந்தியா அருகில் சென்று அவளை அணைத்துக் கொண்டாள் .

மன வேதனை தீரும் வரை அழுதவள் பின் தன் நிலைப்பெற்று , ” இன்னைக்கு வரை அவன் என்ன ஆனான் என்று எனக்கு தெரியாது தீப்ஷீ . என் அப்பாவை பற்றி எனக்கு நல்லா தெரியும்  கண்டிப்பாக அவனை உயிரோடு நரக வேதனையை அனுபவிக்கும் படி செய்திருப்பார் ” .

” எனக்கு எல்லாமே என் அப்பா தான் . ஆனால் அந்த சம்பவத்திற்கு பின் நான் அவர் கிட்ட கூட போகவில்லை . மூன்று மாதம் ஆனது எனக்கு என் அப்பா கிட்ட பயம் இல்லாமல் பேச . நிறைய கவுன்சிலிங் போனேன் . பழையபடி என்னை மாற்ற என் அம்மா, அப்பா நிறைய போராடினாங்க. ”

” அதுக்கு பின் எல்லா இடத்திற்கும் என்னை தனியாக தான் போகணும்னு டாக்டர் சொல்லிட்டாரு. இல்லை என்றால் நான் பயந்து வீட்டிற்குள்ளே முடங்கி போவேன் என்று சொல்ல , எல்லா இடத்திற்கும் என்னை தனியாக அனுப்பினார்கள். ”

” பணத்தால் தான் எனக்கு பிரச்சனை வந்தது அதனால் , எந்த இடத்திலும் என்னை பணக்கார வீட்டு பெண்ணாக காண்பிக்க மாட்டார்கள் எங்க வீட்டில். அதனால், எந்த இடத்திற்கும் காரில் போக மாட்டேன் , சாதாரண உடை தான் , நகை கூட போட மாட்டேன் ” .

” ஆனா , என்னால் இன்றளவும் என் அப்பாவின் தொடுகையை கூட ஏத்துக்க முடியலை ,ஒரு அடி தள்ளி நின்னு தான் அவர் கிட்டே பேசுவேன் . என்னால் இயல்பான குடும்ப வாழ்க்கை வாழ முடியுமா என்று தெரியலை . ஆனா டாக்டர் என் கிட்ட இருக்கும் பயம் போனால் முடியும் என்று தான் சொன்னார் ” .

” மகளின் கல்யாணம் பற்றி யோசிக்க பயந்தவங்க கிட்ட , நான் ஒருவரை விரும்புவதாக  சொன்னேன் , அவர் மகிழ்ந்து போய் சம்மதித்தார் . ஒரு வேளை எனக்கு எந்த பாதிப்பும் இல்லாமல் இருந்திருந்தால் அவரும் ஸ்டேட்டஸ் , ஜாதி என்று யோசிச்சி இருப்பாரோ என்னவோ .

ஆர்.ஈ.எஸ் இன் ஒரே வாரிசை அப்படி எளிதாக யாரோ ஒருவனை விரும்ப அனுமதிப்பார்களா ? அப்பா சத்யாவை பற்றி தெரிந்துக் கொள்ள டிடெக்டிவ் ஏஜென்ட் மூலம் ஒருவரை அனுப்பினார் . அப்படி தான் எனக்கு சத்யா அம்மா , அப்பா, பின் கமலாமா , உன்னை பற்றி எல்லாம் தெரிந்தது ” .

” சத்யாவின் அம்மா , அப்பாவை பத்தி தெரிந்ததால். பெரியதாக நானோ, என் பெற்றோரோ, சத்யாவை தப்பாக நினைக்கலை . அவனின் மேல் எனக்கு காதல் தான் அதிகமானது . சத்யா என்னை ஏற்றுக் கொள்வானா என்று எனக்கு தெரியாது ஆனா சத்யாவை தவிர வேற யாருக்கும் என் வாழ்க்கையில் இடம் இல்லை ”  என்று முடித்த சந்தியா அமைதியாக சேரில் சாய்ந்து அமர்ந்தாள் தீப்ஷீயின் பதிலை எதிர்பார்த்து .

சந்தியா சொல்லியதைக் கேட்ட தீப்ஷீ ஐந்து நிமிடங்கள் அமைதியாக இருந்தாள். அவள் சொன்னதை உள்வாங்கி, தனக்குள் யோசித்தாள், பின்  சந்தியாவிடம்,

” சந்தியா என்னால எளிதாக எந்த முடிவையும் எடுக்க முடியலை . இது சத்யாவின் விருப்பத்தை பொருத்தது . ”

” உன்னையும் சத்யாவை சேர்த்து வைப்பேன் என்று என்னால  உறுதியாக சொல்ல முடியாது‌.”

” சத்யாவிற்கு திருமணத்தில் விருப்பம் இல்லை. காரணம் அவனின் அம்மா , அப்பா. முதல அவனை கல்யாணத்திற்கு சம்மதிக்க முயற்சி செய்யணும் . பின், உன்னை சத்யாவிற்கு பிடித்திருக்கா இல்லையா என்று தெரிஞ்சிக்கணும் . கண்டிப்பாக உன்னை பற்றி எல்லாம் தெரிந்தவரை தான் நீ கல்யாணம் செய்ய வேண்டும் . சத்யா உன்னுடைய கடந்த காலத்தை வைத்துக் கண்டிப்பாக உன்னை வேண்டாம் என்று சொல்ல மாட்டான் . சத்யாவை போன்ற ஒருவனால் தான் உன்னுடைய காயத்திற்கு மருந்தாக இருந்து காலம் முழுக்க உனக்கு துணையாக இருக்க முடியும் .”

” சத்யா கல்யாணத்திற்கு சம்மதம் சொல்லும் வரை காத்திருப்பீயா? அவன் சம்மதம் சொன்னால் , என்னை தான் பெண் பார்க்க சொல்வான் , நான் உன்னை தான் அவன் கிட்ட கல்யாணப் பெண்ணாக காட்டுவேன். ” என்றாள் தீப்ஷீ .

” எவ்வளவு வருடங்கள் ஆனாலும் நான் சத்யாவிற்காக காத்திருப்பேன் . அவனை தவிர வேறு யாருக்கும் என் வாழ்வில் இடமில்லை. ” என்றாள் சந்தியா.

‘ பெண்ணே ! பல வருடங்கள் இல்லை பல ஜென்மம் காத்திருக்க வேண்டும் ‘ என்றது விதி .

” சத்யாவிற்கு என்னதான் நான் , கமலாமா இருந்தாலும் அவனுக்கு தாய் அன்பு கிடைக்கல்லை . அதனால் , நீ என் சத்யாவை நல்லா பார்த்துக்குவியா ? அவனுக்கு உன்னுடைய முழு அன்பை தருவியா ? அவனை உன் குழந்தையாக பார்த்துக்குவியா ? ” என்றுக் கேட்டாள் தீப்ஷீ .

அவளின் நட்பின் ஆழத்தைக் கண்டு வியந்தவள் , ” கண்டிப்பாக நான் சத்யாவை நல்லா பார்த்துப்பேன் ” என்றாள் சந்தியா .

” ஓகே சந்தியா , நீ இப்போ சத்யா கிட்ட காதலை பற்றி சொல்ல வேண்டாம் . நேரம் வரும் போது நானே சொல்கிறேன். ஆனா சந்தியா உன்னுடைய கடந்த காலத்தை பற்றி நான் சத்யா கிட்ட இன்னைக்கு பேசட்டுமா ? ”  என்றுக் கேட்டாள் தீப்ஷீ .

” என்றாவது ஒரு நாள் சொல்லித்தானே ஆகணும். அது இன்றாக இருப்பதில் எனக்கு எந்த பிரச்சனையும் இல்லை தீப்ஷீ . எனக்கு சத்யா கிட்ட காதல் சொல்லும் தைரியமெல்லாம் இல்லை. ” என்றாள் சந்தியா .

சத்தமாக சிரித்தாள் தீப்ஷீ , ” சரி வா கிளாஸிற்கு போவோம் . கிளாஸ் கட்டடிச்சது மட்டும் சத்யாவிற்கு தெரிந்தால் அவ்வளவு தான் என் நிலை.”

*****

ஊஞ்சலில் தீப்ஷீ அமர்ந்திருக்க அவள் அருகில் நின்றிருந்த சத்யா , ” காலைல எங்க போனா அம்மு ? கிளாஸ்ல உன்ன பார்க்கமுடியல . ” என்றுக் கேட்டான் .

” அது எப்படி சத்யா ? நான் என்ன பண்ணாலும் உனக்கு தெரியுது . ”  என்றுக் கேட்டாள் தீப்ஷீ .

” அதெல்லாம் அப்படி தான் . எனக்கு உன்னை கவனித்துக் கொள்வதைவிட வேறு எந்த வேலையும் இல்லை . பதிலை சொல்லு அம்மு ”

” அது வந்து சத்யா , நான் சந்தியாவோடு கேன்டீன் போனேன். முக்கியமான விசயத்தைப் பத்தி பேச . ”

” அதுக்கு கிளாஸ்ஸை கட்டடிப்பியா ? டிகிரி இல்லை என்றால் ஐ.பி.எஸ் பத்தி கனவு கூட காணமுடியாது நினைவில் வைத்துக்கொள் அம்மு . ” .

” சத்யா ,  ஹாஃப்  டே கிளாஸ் கட்டடுச்சதற்கு , நான் என்னமோ அரியர் வெச்ச மாதிரி பேசுற . சந்தியாவின் பாஸ்ட் பத்தி பேச போனேன் . ”

” அப்படி என்ன சந்தியாவுக்கு நடந்தது ? ” என்றுக் கேட்டான் சத்யா .

” அது வந்து சத்யா.”  என்று தொடங்கியவள் சந்தியாவின் கசப்பான கடந்த கால நிகழ்வுகளை சொன்னாள் .

சந்தியாவின் காதலை தவிர்த்து சந்தியா இன்று அவளிடம் சொல்லிய அனைத்து விஷயத்தையும் சத்யாவிடம் சொன்னாள் தீப்ஷீ.

” சில ஆண்களால் , அனைத்து ஆண்களுக்குமே தலை குனிவு தான் . ”  என்றான் சத்யா .

சந்தியா மேல் அவனுக்கு மரியாதை வந்தது . மீண்டும் அவளோடு பேசலாமா என்றுக் கூட நினைத்தான் .

” அம்மு , சந்தியாவோட நட்பை எப்பொழுதும் விட்டுவிடாதே . ” சத்யா .

‘ எனக்கு தெரியாதா என்னோட சத்யாவை பற்றி . ‘ என்று மனதில் நினைத்தவள் , ” இல்ல சத்யா , எப்பவும் நாங்க நல்ல நண்பர்களா இருப்போம் . ” என்று சத்தமாக சொன்னவள் மெதுவாக,” பின்ன உன்னோட மனைவியோடு என் பந்தம் எப்படி முடியும் ? ” என்றாள் தீப்ஷீ .

” இப்போ என்ன சொன்ன ? ” என்றுக் கேட்டான் சத்யா .

” நான் ஒன்னும் சொல்லலையே ” என்றாள் தீப்ஷீ .

” சத்யா , உன் ப்யூச்சர் பிளான் என்ன ? ”

” என்ன அம்மு திடீருனு கேக்குற. ”

” சும்மா தான் சத்யா , நீ எப்படியும் எம்.பி.ஏ ரெகுலர் கோர்ஸாகவும் எம்.சி.ஏ கரஸாகவும் முடிச்சிடுவ . ஆல்ரெடி நீ நிறைய அப்பிளிகேஷன் கிரியேட் செஞ்சுட்டு இருக்க. இனி என்ன உன் பிளான்? பேங்க் சைட் ஜாபா இல்லை, டெக்னிக்கல் ப்ரோக்ராமிங் சைடா ? ”

” கண்டிப்பா டெக்னிக்கல் தான் அம்மு . நான் தனியாக ஒரு சாஃப்ட்வேர் கம்பெனி  ஆரம்பிக்க போறேன் . ”  என்றான் சத்யா .

” வாவ் சூப்பர் சத்யா , அப்போ எம்.பி.ஏ முடித்ததும் நீ கம்பெனி ஆரம்பிப்பியா ? ” .

” இல்ல அம்மு , இரண்டு வருடம் எதாவது சாஃப்ட்வேர் கம்பெனியில் ப்ரோக்ராமராக வேலை பார்க்க போகிறேன் . அப்போ தான் எனக்கு கம்பெனியை எப்படி நடத்த வேண்டும் என்று எக்ஸ்பீரியன்ஸ் கிடைக்கும் . அதுக்கு அப்புறம் தான் கம்பெனி ஆரம்பிப்பேன் . ”

” நல்ல ஐடியா சத்யா . ”

” அம்மு நாளைக்கு நான் காலேஜ் வர மாட்டேன் . நேத்து சொன்னேனே ப்ராஜெக்ட் பத்தி . அது சம்பந்தமா பெங்களூர் போக வேண்டும் . இன்னைக்கு நைட் பஸ்ஸில் போகிறேன் . நாளைக்கு நைட் வந்துவிடுவேன் . ” .

” ஓகே சத்யா . பார்த்து ஜாக்கிரதையா போயிட்டு வா . ”

” நீ எப்படி காலேஜ் போவ ? ”

” காலையில் அப்பாவோடு போய்விடுவேன் . வரும்போது தான் தெரியலை என்ன செய்றதுனு ”  என்றாள் தீப்ஷீ .

” நாளைக்கு காலேஜ் லீவ் போட்டுடு அம்மு ” .

” இல்லை முடியாது சத்யா , நாளைக்கு கண்டிப்பா போக வேண்டும், கம்ப்யூட்டர் லேப் இருக்கு . ” என்றாள் தீப்ஷீ .

” சரி , லேப் இருக்குன்னா போக தான் வேண்டும் . நீ கவனமா இரு அம்மு . தனியா காலேஜில் இருந்து வராதே . நான் வேணும்னா பாலாவை உன்ன டிராப் பண்ண சொல்லவா ? ” என்றுக் கேட்டான் சத்யா .

” இல்ல, வேண்டாம் சத்யா . அப்பாவையே வர சொல்கிறேன் . ”

” சரி வா அம்மு , வீட்டிற்கு போலாம் நேரமாகுது . அப்புறம் கமலாமாவை பார்த்துக்க. ”

” நீ சொல்ல தேவையில்லை , எங்க அம்மாவை எனக்குப் பார்த்துக்கத் தெரியும் . ஒரு நாள் தான போற . ”  என்று உதட்டை சுழித்தாள் தீப்ஷீ .

” சரி வாயாடி , வா போவோம் . ”  என்றான் சத்யா .

தேவ்வோடு தான் தீப்ஷீ காலேஜிலிருந்து வீட்டிற்கு வருவாள் என்று முன்பே தெரிந்திருந்தால் தீப்ஷீ காலேஜுக்கு லீவ் போட்டிருப்பாளோ ?????