Author Blog

நான் எழுதத் துவங்கியதே விளையாட்டான விபத்து. கண்மண் தெரியாமல் ஓடிய கற்பனைக் குதிரையை கடிவாளமிட்டு கதைகளாகக் களமிறக்கினால் என்ன என்று தோன்றிடவே, வாசகியாக மட்டுமே வலம் வந்தவள் உள் மன ஆசைகளை கற்பனகளை அழுகையை ஆதங்கங்களை கோபங்களை மகிழ்ச்சியை சொற்களாய் வடித்து கவிதை எழுத முயற்சித்தவள் கதைகள் எழுதத் தொடங்கினேன். என் எழுத்தையும் ஏற்றுக் கொண்டப் பெரிய மனதுக்காரர்களால் எழுதுவதைத் தொடர்ந்துக் கொண்டிருக்கிறேன். எத்திசையில் இனி பயணமென்ற பெரும் வினா முன்நின்ற பொழுது மனதை திசைத் திருப்பப் பயணித்தக் களமின்று என் வழிகாட்டியாய் மாறிப் போனதால் அதன் கைப்பற்றி நடைப்பழகிக் கொண்டிருக்கிறேன்.

பிழைகள் செய்து பயின்றாலே புரிதல் அதிகமாகும் அது கல்வியானாலும் வாழ்க்கையானாலும். அதற்காக எல்லாப் பிழைகளையும் சரி செய்துவிட இயலாது. சரி செய்யவியலாப் பிழைகளும் உண்டு. எழுத்துப்பிழை சரிசெய்ய இயலும் பிழை. வாசிப்போரின் புரிதலில் தாக்கம் விளைவிக்காது. இதனைப் பயிற்சியின் மூலம் களையலாம். கருத்துப்பிழை சரிசெய்யவியலா பிழை. வாசிப்போரின் புரிதலில் மட்டுமல்ல மனதிலும் தாக்கம் விளைவிக்கும். கருத்துப்பிழை கதையின் கருவிலும் எதிரொலிக்கும். இதனை வாசிப்பு, கலந்துரையாடல், சுய அலசல், சொல்லும் கருத்தின் மீதுக் கொண்ட புரிதல் ஆகியவற்றை வளர்த்தலின் மூலம் களையலாம்.

ஒரு வரியென்ன ஒரு சொல் கவிதையொன்று கூறுகிறேன். " "தமிழ் அன்னை!" பெருங்கவிதைகளான தமிழும் வந்துவிட்டாள் அன்னையும் வந்துவிட்டாள் ஒரே சொல்லில்!"

எனக்கு சங்கடமாக இருக்கும் பிரிவு காதல். இதுவரை எழுதிய, எழுதிக் கொண்டிருக்கும் கதைகளில் காதல் இருந்தாலும் கேட்டதைப் பார்த்ததை மட்டுமே கொண்டு காதலை கூறிட முடியுமென்று எனக்கு தோன்றாததினாலேயே எனக்கு காதல் சங்கடமாக இருக்கிறது. அது ஒரு நுண்ணுர்வு அதனை மேலோட்டமாய் எழுதவதை மனம் ஒப்புக் கொள்ளா விட்டாலும் காதலின் மேல் கொண்ட ஈர்ப்பு அதனை எழுதத் தூண்டுகின்றதினாலேயே சங்கடமாகயிருந்தாலும் எழுதிக் கொண்டிருக்கிறேன்.

இதுவரை எதிர்மறை கதைகளை எழுதியதில்லை. ஆனால் எதிர்மறை நிகழ்வுகளை வைத்து எழுதியிருக்கிறேன். அப்படி எழுதுகையில் மனம் கணமாக இருக்கும். மிகுந்த கணமாகும் வேளைகளில் எழுதுவதை நிறுத்தி வைத்துவிடுவேன். மனம் சரியாக இரண்டு மணி நேரமானாலும் சரி இரண்டு நாட்களானாலும் சரி. நல்ல இசை கேட்பது, தனிமையில் தோட்டத்தில் அமர்வது, இயற்கையோடு கதைப்பது, பிடித்தவர்களிடம் கதைப்பது என்று மனதை இலகுவாக்கி ஒருநிலைப் படுத்தியப் பிறகே விட்ட இடத்திலிருந்து எழுதுவதைத் தொடர்வேன்.