சிலையும் சிவமும் 2

சிலையும், சிவமும்-2

(பாகம்-1)

 

முத்து: நவக்கிரகங்களில் இது சந்திரனுக்கு உரிய கல்.

முத்தை மாலையாகவோ, மோதிரமாகவோ அணிந்து கொண்டால் சுவாச கோளாறுகள், தொண்டை சம்பந்தமான கோளாறுகள், தலைவலிகள், மனநோய் போன்றவைகள் தீரும்.

 

 

சித்தன் தன் பேச்சை தொடர்ந்தார் “கல்யாணம் முடிஞ்சு வந்ததுமே..
அவளுக்கு தன் புருஷன் அந்தஸ்தா இருந்தது ரொம்ப சந்தோஷமா இருந்தாலும், தன் மாமியார் சமையல் வேலை செய்யறவனு சொல்லிக்க அவமானமா இருந்தது. இதை மறைச்சுக்கிட்டு தான் மாமியார் கிட்ட நல்லவ மாதிரி பழகிட்டு வந்தா…..

 

“ஆனா எத்தனை நாள் நடிக்க முடியும் சொல்லு..அவ சும்மா இருந்தாலும் அவளை அவளோட அம்மா சும்மா இருக்கவிடல…”

 

“ஐயோ அப்பறம் என்னாச்சு ஐயா?|” என அதிர்ச்சி அடைந்த ஈஸ்வர் கேட்க…

 

சித்தன் “வேற என்ன செய்வா.. அம்மா பேச்சை கேட்டு பாசமா இருக்கிற மாமியாரை தொடர்ந்து அவமானம் செய்ய ஆரம்பிச்சா..”

 

“அத்தனையும் புருஷனுக்கு தெரியாம தான் செய்வா…அவ புருஷன் வீட்டுல இருந்தா மாமியார் கிட்ட மரியாதையா நடந்துப்பா….”

 

“அவன் வீட்டுல இல்லேனா மாமியாரை தேவை இல்லாத சுமை.. வீட்டுக்கு பாரம்னு சொல்லி சொல்லி அசிங்கப்படுத்தி அழ வைப்பா”

 

“தான் வந்த கொஞ்ச நாள்லயே…. மாமியாரை இப்படி தொடர்ந்து மனசு வெறுத்து போகும் படி
கேவலமா பேசி பேசியே வீட்டை விட்டு வெரட்டி விட்டுட்டா…அதுக்கு துணையா இருந்த அவளோட அம்மா கை கால் வராம இழுத்துக்கிட்டு போய் சேர்ந்தா” என சொல்லி முடித்தார்.

 

“எங்க பாட்டி எங்கம்மாவை எதுவுமே கேட்கலயா.. சண்டை கூட போடலையா…” என ஈஸ்வர் அடுத்த கேள்வி கேட்க

 

சித்தன் “ஏம்பா… இப்டி என்னை கேள்வி கேட்கறீயே.. இதே போல அன்னிக்கு உங்க பாட்டி வீட்டுலேந்து வெளியே போகும் போது யாரும் கேட்பாரே இல்லையே.. பாவம்..அவளுக்கு எதிர்த்து பேசவுமா தெரியாது..சண்டையும் போட தெரியாத வெகுளி பா..”

 

“பேசி வீணா மருமக மனசுக்கு கஷ்டம் குடுக்க கூடாது..யாரையும் வார்த்தையால நோக அடிக்க கூடாது…. நமக்கு எதுக்கு வம்புனு அமைதியா வீட்டுலேந்து கிளம்பி போயிட்டா” என்றார்.

 

“எங்க வீட்டுலேந்து கிளம்பி எங்க போனாங்க எங்க பாட்டி.. உங்களுக்கு தெரியுமா” என அவசர அவசரமாக ஈஸ்வர் கேட்க..

 

சித்தன் வெகு நிதானமாக “தெரியும்… கூடவே இருந்து அவளை தடுக்க முடியாம…

ஒண்ணும் செய்ய முடியாம… கையாலாகாதவனா அமைதியா பாத்துட்டு இருந்தேனே..”

 

“தன்னை ஆதரிக்க ஆள் இல்லாம போயிடவே..வாழ்க்கையில இருந்த ஒரே பிடிப்பான தன் பிள்ளைக்கு தான் பாரமா இருக்க கூடாதுனு ஒரு ஆசிரமத்துல போய் சமையல் வேலை செஞ்சுட்டு பிழைச்சுக்கிட்டு இருக்கா..”

 

அதை கேட்டு இன்னும் அதிர்ந்த ஈஸ்வர் “என்னது… என் பாட்டி இன்னும் உயிரோடவா இருக்காங்க…அவங்க செத்து போயிட்டதா சொல்லி தானே எங்கப்பா தை அமாவாசைக்கு திதி பண்ணுவார்.. ஒவ்வொரு மாசமும் தர்ப்பணம் பண்ணுவாரே” என்றான்.

 

அதை கேட்ட சித்தன் வேதனையான சிரிப்பு ஒன்றை சிரித்து விட்டு “அது எல்லாம் உங்கம்மாவோட சதி பா… உங்க பாட்டிய வீட்டை விட்டு அனுப்பினது தை அமாவாசை அன்னிக்கு …”

 

“தான் வீட்டை விட்டு அனுப்பின வேதனைல… தன்னோட மாமியார்…

நிச்சயமா எங்கயாவது குளம் குட்டைல தான் இறங்கி இருப்பாங்கற பூரண நம்பிக்கைல அவ அந்த மாதிரி உங்கப்பா கிட்ட திரிச்சு சொல்லிட்டா..”

 

“அந்த சமயத்துல உங்கப்பா சரியா ஆபீஸ் வேலையா டெல்லி போனது உங்கம்மாக்கு ரொம்ப சௌகர்யமா போச்சு…”

 

“உன்னோட பாட்டி….உங்கம்மா பண்ண கொடுமையை தாங்கிக்க முடியாம, பையன் கிட்டயும் சொல்லிக்க முடியாம…ரொம்ப மனசொடிஞ்சு போய், மனசு நிம்மதி வேண்டி அடிக்கடி பல கோயில்களுக்கு போவா..”

 

“உங்க பாட்டி அப்படி கோயில்களுக்கு போறதை வெச்சு…சரியா தனக்கு சாதகமா பயன்படுத்திக்கிட்டா… உங்கம்மா..” என முடித்தார்.

 

ஈஸ்வர் “ஐயா..ஒரு நிமிஷம்…நீங்க இதுவரைக்கும் சொன்னதை கேட்கவே எனக்கு பெரிய அதிர்ச்சியாஇருக்கு…தப்பா நெனக்காம இருந்தா..எனக்கு ரொம்ப தாகமா இருக்கு.. குடிக்க தண்ணி கிடைக்குமா…”

என கேட்டான்.

 

சித்தன் “அதுக்கென்ன..தாராளமா  தரேன்.. தாகத்துக்கு தண்ணி கூடவா குடுக்காம இருப்பேன்… இரு போய் எடுத்துட்டு வரேன்..”என சொல்லி போனார்.

 

அவர் திரும்பி வர இருந்த நிமிடங்களில், அவர் சொன்னதை கேட்டு அதிர்ச்சி அடைந்த சூழ்நிலையில் இருந்து வெளியே வந்து… இனி நடந்த சம்பவங்களையும் தன் குடும்ப மர்மங்களையும் அவரிடம் இருந்து தெரிந்து கொள்ள முடிவெடுத்து அவருக்காக காத்திருக்க ஆரம்பித்தான்.

 

சித்தன் தண்ணீர் கொண்டு வந்து தந்ததும், நன்றியோடும் மகிழ்வோடும் அதை வாங்கியவன் கட கட என தன் ஷர்ட் நனைய நனைய குடித்து முடித்தான்.

 

“இப்ப மீதி விஷயங்களை சொல்லுங்க ஐயா” என அவன் கேட்டதும்..

 

சித்தன் “உங்க பாட்டி திருச்சிக்கு உச்சி பிள்ளையாரை தரிசனம் செய்ய போய் இருந்ததாகவும்…
கோயிலுக்கு போறத்துக்கு முன்னாடி காவேரில போய் குளிக்க போனதாவும், குளிக்கும் போது திடீர்னு வந்த வெள்ளத்துல அடிச்சுட்டு போயிட்டதாகவும்…

அங்க இருந்தவங்க, பாத்தவங்க சொன்னதாவும்…”

 

“காரியம் பண்றதுக்கு கூட அவ உடம்பு கிடைக்கலனு…அத நெனச்சு தான் நிறுத்தாம அழறதாவும்…தன் கடமைய சரியா செய்யாம தவறிட்டதால எப்டி உங்கப்பாவ பாக்கறதுனு வேதனையா இருக்கிறதாவும் உங்கப்பாக்கு ஒரு கடிதாசி எழுதிட்டு போட்டுட்டு கூடவே உங்க அம்மா செத்து போயிட்டானு ஒரு தந்தியும் அடிச்சா…..”

 

“அதை உண்மைனு நம்பற மாதிரி அப்ப காவேரில வெள்ளம் வந்து நெறய பேர் உயிர் போக… உங்கப்பாவும் பதறி போய் உடனே கெளம்பி வந்து தன் அம்மாக்கு காரியம் பண்ணிட்டான்..”

 

“பாவம் அவனுக்கு இன்னும் தன்னோட அம்மா உயிரோட இருக்கானு தெரியவே தெரியாது..”

 

“பண்ண பாவம்… போறாத..

வருஷம் தவறாம…விடாம உயிரோட இருக்கிற அவளுக்கு திதி வேற குடுக்கறான் போல இருக்கு..” என சொல்லி பெருங்குரலில் சிரித்தார்.

 

“தயவு செய்து சிரிக்காதீங்க..
அவங்க உயிரோட இருக்கிறது எப்டி எங்கப்பாக்கு தெரியும்…
தெரிஞ்சிருந்தா..செய்வாரா…

யாராவது தெரிஞ்சே தப்பு பண்ணுவாங்களா…தப்புனே தெரியாம அவர் பண்ணா அது எப்படி பாவமாகும்” என ஈஸ்வர் ஈனஸ்வரத்தில்  கேள்வி எழுப்பினான்.

 

சித்தன் “ம்ம்ம்… என்ன பண்றது..

எல்லாம்..  விதிக்கப்பட்டபடி நடக்குது..எந்த மாற்றமும் பண்ண முடியாதே… இதுல உங்கப்பாவோட தப்பு என்ன இருக்கு…”

 

“ஆனா சாஸ்திரப்படி உயிரோட இருக்கிறவங்களுக்கு காரியம் பண்ண கூடாதே.. அது வீட்டுக்கு, குலத்துக்கே விரோதம்…கெடுதல் தானே தரும் பா” என வருத்தமாக சொல்லி முடித்து..சற்று அமைதியானார்.

 

திடீரென எதையோ  நினைத்து கொண்ட சித்தன் “ம்ம்ம்…எல்லாம் உங்க எள்ளு தாத்தா சுந்தரேசன் செஞ்ச பாவம்….இப்ப அது உன் தலைல வந்து விடிஞ்சிருக்கு..” என சொல்லி மீண்டும் அமைதியானார்.