உயிர்ப்பாங்கி நண்பேன் டா 17

அத்தியாயம் 17

” சத்யா , வந்துட்டியா . கொஞ்சம் தீப்ஷீயை பாரு பா , முகமே சரியில்லை . மாப்பிள்ளை வீட்ல இருந்து வர்ற நேரம் , இவள் இப்படி இருந்தா, அவங்க தப்பா நினைக்க மாட்டாங்களா ? ”  என்றார் சரண்யா .

” சரண்யாமா , மாப்பிள்ளைனு நீங்களே முடிவு செய்யாதீங்க. இன்னும் அம்மு சம்மதம் சொல்லலை . ” என்றான் சத்யா .

” தங்கமான பையன் அவளுக்கு எப்படி பிடிக்காம போகும் . நீ போய் அவ கிட்ட பேசி சரி செய்வ என்று நினைத்தால்  இங்கு நீயே சோகமா நிக்குற . ” என்றார் சரண்யா .

” அப்படியெல்லாம் இல்ல சரண்யாமா . நான் அம்முவை சரி செய்றேன் . அம்மு என்னிக்குமே உங்களையோ, அப்பாவையோ அவமானப் படுத்துற மாதிரி நடக்க மாட்டா . நீங்க கவலை படாம வேலையை பாருங்க . ” என்றான் சத்யா .

‘ ஆமாம்ல , என் மகள் சேட்டை செய்வாளே தவிர நல்ல பிள்ளை . ‘ என்று நினைத்த சரண்யா , சத்யாவின் ஆறுதலான வார்த்தையில் பதட்டம் இன்றி அமைதியாக , வேகமாக வேலையை செய்ய ஆரம்பித்தார்.

சத்யா , தீப்ஷீ அறைக்கு சென்றான்.

அங்கு தீப்ஷீ சோகமாக பெட்டில் உட்கார்ந்திருந்தாள் .

அவளை இயல்பாக்க சத்யா , ” எங்கடா ரூம்லையும் அம்முவை காணோம் . ”  என்று சத்தமாக பேசிக் கொண்டே தேடிவது போல் பாவனை செய்தான் .

” என்ன சத்யா விளையாடுறியா ? ”  என்றாள் தீப்ஷீ .

” குரல் மட்டும் நல்லா கேட்குது . ஆளை காணோம் . ” என்றான் சத்யா  .

” சத்யா.  ” என்று கத்தியவள் சத்யாவை அடிக்க வந்தாள் .

” சும்மா விளையாடினேன் அம்மு . முன்ன பின்ன நான் உன்ன புடவையில் பார்த்ததில்லை அதான் யாரோ என்று நினைச்சிட்டேன் .”  என்று அவளின் அடியை வாங்கிக் கொண்டே சொன்னான் சத்யா .

அழகோவியமாக இருந்தாள் தீப்ஷீ . மயில் பச்சையும் , ஊதா கலரும் கலந்து வரும் டிசைனர் சாரி போட்டிருந்தாள் . அவள் எப்போதும் போடும் சிறிய தங்க தோடும் , தங்க செயின் மட்டுமே போட்டிருந்தாள் .  எந்த ஒப்பனையுமின்றி சிறிய வட்ட கருப்பு பொட்டு வைத்து தேவதையாக இருந்தாள்  தீப்ஷீ . என்ன சிரிப்பு தான் தீப்ஷீ முகத்தில் இல்லை . சிரிப்பும் இருந்தால் அவள் இன்று பேரழகி தான் .

சத்யாவின் கேலிக்கு எதுவும் சொல்லாமல் அமைதியாக சென்று பெட்டில் உட்கார்ந்தாள் தீப்ஷீ .

” என்ன அம்மு , நான் இருக்கும் போது நீ கவலைப்படலாமா ? நீ நாளைக்கு ஐ.பி.எஸ் ஆக போற… அப்போ நீ எவ்வளவு தைரியமா இருக்கணும் . உன்னால் வீட்டில் உன்னோட தேவைக்காக கூட தைரியமா போராட முடியலைனா  நாளைக்கு நீ எப்படி தைரியமா மக்களை காப்பாத்துவ ?  ”

கொஞ்சம் கொஞ்சமாக தெளிந்தாள் தீப்ஷீ .

” சத்யா , கண்டிப்பா அப்பா அம்மாவுக்காக நான் கல்யாணம் பண்ணிப்பேன் . என்ன பெண் பார்க்க வருபவனிடம் என் கனவை தைரியமா சொல்லி சம்மதமான்னு கேட்பேன்  . ஒருவேளை ஒத்துக்கல்லைணா நான் சம்மதிக்க மாட்டேன் .  அப்பா வேற ஆளை தான் தேடணும் .”

” தட்ஸ் மை கேர்ள் . அப்படியே லைட்டா சிரி .  ” என்றான் சத்யா .

வேண்டுமென்றே தீப்ஷீ ” ஈ …. ” என்று எல்லா பல்லையும் சிரிப்பதுப் போல் காண்பித்தாள்.

” இப்படியே போய் வர போகிற பையன் முன்னாடி நின்னா போதும் , அவனே உன்ன வேண்டாம்னு கும்புடு போட்டுட்டு  ஓடிடுவான் . ” என்றான் சத்யா .

” நல்ல ஐடியா சத்யா . ”

” ஹே அம்மு அப்படியெல்லாம் பண்ணி மானத்தை வாங்கிடாதே.  ”  என்று சத்யா சொல்லிக் கொண்டிருக்கும் போது உள்ளே வந்தான் சர்வேஷ் .

” என்ன இரண்டு பேரும் இன்னைக்கு கூட விளையாடிட்டு இருக்கீங்க ? மாப்பிள்ளை வீட்டிலிருந்து வந்துட்டாங்க. அப்பா உங்க இரண்டு பேரையும் கூட்டிட்டு வர சொன்னார்.” என்றான் சர்வேஷ் .

இப்போ சர்வேஷ் , சத்யாவோடு பேசுவான் . வேலைக்கு சென்ற பின் தன் தவறை உணர்ந்து சத்யாவோடு பேச ஆரம்பித்தான் சர்வேஷ். (ஒருவேளை அவன் வேலை செய்யும் இடத்தில் ஏதாவது போதி மரம் இருக்குமோ. இருந்தாலும் இருக்கும். )  சத்யாவும் எந்த பந்தாவும் செய்யாமல் சர்வேஷ்ஷோடு பேசினான் .

” பெண் பார்க்க தான் வந்திருக்காங்க சர்வேஷ் . ”  என்றான் சத்யா .

” ஏதோ ஒன்னு . இப்போ வாங்க வெளியே போகலாம் . ”  என்ற சர்வேஷ் முன் செல்ல…  சத்யாவும், தீப்ஷீயும் பின்னால் வந்தனர் .

” இவ தான் என்னோட பொண்ணு தீப்ஷீ.’ என்ற தினேஷ் , நண்பனின் குடும்பத்திற்கு தீப்ஷீயை அறிமுகம் செய்து வைத்தார் .

” இவன் தான் சத்யா  , பக்கத்து வீட்டில் இருக்கும் பையன் என்று சொல்வதைவிட என்னோட இன்னொரு பையன் என்பதுதான் நிஜம் . ”  என்றார் தினேஷ் .

” வா மா , வந்து உட்காரு . சாதாரண ஃபேமிலி கெட் டு கெதராக நினைச்சிக்க .  ” என்றார் கவிதா .

தீப்ஷீயும் எந்த பதட்டமும் இல்லாமல் போய் உட்கார்ந்தாள்  .

” இவன் தான் என் நண்பன் முரளி . இவங்க தான் முரளி மனைவி  கவிதா , இவங்க பையன் தமிழன்பன் . ” என்றார் தினேஷ் .

” என்ன அங்கிள் , இப்போ தான் புதுசா சொல்லுற மாதிரி  இருக்கு.  ” என்று சரியாக யூகித்தான் தமிழன்பன் . தீப்ஷீ  சத்யாவின் முக மாற்றத்தை வைத்து .

” ஆமா அன்பா , நேத்து நைட்டு தான் கல்யாணத்துக்கே சம்மதம் சொன்னா…  அதான் எதுவும் சொல்லாமல் இந்த பெண் பார்க்க நிகழ்ச்சியை தொடங்கிட்டேன் . ” என்றார் தினேஷ் .

” அங்கிள் நீங்க செய்தது தப்பு . இது வாழ்க்கை சம்மந்தப்பட்டது . முதல என்னப் பத்தி சொல்லி, உங்க பெண்ணுக்கு பிடித்திருந்தால் மட்டுமே நீங்க இன்னைக்கு பெண் பார்க்கும் நிகழ்ச்சியை செய்திருக்கணும் .” என்றான் தமிழன்பன் .

” எனக்கு டைம் இல்ல அதான் சொல்லல அன்பா . ”
என்றார் தினேஷ் .

தமிழன்பன் ஏதோ சொல்ல வர அதற்குள் முரளி , ” நீ சும்மா இரு டா , இப்பவும் தீபுவுக்கு பிடித்தித்தால். தான்  எதுவா இருந்தாலும் முடிவு செய்ய போறோம் . ” என்று தமிழன்பன் வாயை மூடினார் .

தமிழன்பன்  தன்மனதில் நினைத்ததை நேராக பேசியதை பார்த்து , இருபத்தைந்து மார்க் போட்டாள் தீப்ஷீ . சத்யா ஐம்பது மார்க் போட்டான் .

” அங்கிள் சொல்லலை ணா  என்ன ? நான் சொல்றேன் . என் பெயர் தமிழன்பன் , இந்தியன் வங்கி மயிலாப்பூர் பிரான்ச்சில் மேனேஜராக இருக்கேன் . கோபம் வரும் , எந்த கெட்ட பழக்கமுமில்லை . ” என்றான் தமிழன்பன் .

” இரண்டு மணி நேரம் நாங்க இங்க தான் இருக்க போறோம் . நல்லா யோசிச்சி உங்க முடிவ சொல்லுங்க . ஆனா, நான் இப்பவே என் விருப்பத்தை சொல்லிடுறேன் , எனக்கு உங்களை பிடிச்சிருக்கு . உங்களுக்கும் பிடித்திருந்தால் மேற்படி பேசலாம் , இல்லணா  நண்பர்களாக இருக்கலாம் . ” என்றான் தமிழன்பன் .

அவன் சொல்லியவிதம்  பிடித்திருக்க முதல் முறை அவனை நிமிர்ந்து பார்த்தாள் தீப்ஷீ . ‘ மனதில் பட்டதை பட்டெனப் பேசுகிறான் . பார்க்கவும் அழகாகதான் இருக்கிறான் . ஆனாலும்
ஏதோ தடுக்குதே . ‘  என்று மனதில் நினைத்த தீப்ஷீ , ” ஓகே.  ” என்றாள் தீப்ஷீ .

சூழ்நிலையை சகஜமாக்க தீப்ஷீயை சீண்டுவதுப் போல் தமிழன்பன் , ” எனக்கு ஓகேவா தீப்ஷீ ??? ” என்றுக் கேட்டான் .

” இல்ல , நீங்க சொன்னதுக்கு ஓகே . ” என்று தீப்ஷீயும் விளையாட்டாக சொன்னாள் .

சரண்யா அருகில் நின்றுக் கொண்டிருந்த சத்யா மெதுவாக அவர் காதில் , ” சரண்யாமா , நான் கொஞ்சம் வெளியே போயிட்டு வரேன் .  ” என்றான் .

” இப்போ , எங்கே போற சத்யா ? ” என்றுக் கேட்டார் சரண்யா .

” முக்கியமான வேலை இருக்கு . ” என்று அவரிடம் மெதுவாக சொல்லியவன்  .

” எல்லாரும் பேசிட்டிருங்க இதோ வந்துடுறேன் . ”  என்று நாகரீகம் கருதி எல்லோரிடமும் சொல்லிய சத்யா, வெளியே சென்றான் .

‘ இவங்க முன்னாடி சத்யாவை உரிமையா, இப்போ எங்க என்ன தனியா விட்டுட்டு போறேன்னு கத்த முடியலையே . அன்னைக்கு ஒரு நாள் அப்பா சொன்னாங்களே கல்யாணம் ஆன சத்யாவிட்டு பிரியணும்னு‌‌. இனி என்னுடைய நட்பு சத்யாவோடு முன்பு போல் இருக்காதா ? ‘ என்று நினைத்த தீப்ஷீ , கண்ணில் ஏக்கத்தோடு சத்யாவையே பார்த்தாள் .

அவளின் வேதனையை உணர்ந்தது போல் சரியாக அந்த நொடி திரும்பி தீப்ஷீயை பார்த்த சத்யா , கண்களை மூடித் திறந்து  , நான் இருக்கிறேன் , பயப்படாதே என்று பார்வையால் சொன்னான் .

அதைப் புரிந்துக்கொண்ட தீப்ஷீயின் முகத்தில் சிறு புன்னகை , மனதிலும் ஒரு தீர்மானம் எடுத்துக் கொண்டாள்  .

அனைத்தையும் பார்த்தும் பார்க்காததுப் போல் உட்கார்திருந்தனர் முரளி , கவிதா , தமிழன்பன் .

” வாங்க அண்ணி , நாம போய் சமையல் வேலையை பார்க்கலாம் . ”  என்ற கவிதா , சரண்யாவை அழைத்துக் கொண்டு சமையலறை சென்றாள் .

”  முரளி , உனக்கு பிடித்த புத்தகங்கள் ஸ்டடி ரூமில் இருக்கு வா போய் கொஞ்ச நேரம் அதை படிக்கலாம் . ” ,என்ற தினேஷ் , முரளியை ஸ்டடி ரூமிற்கு அழைத்துச் சென்றார் .

தனியாக மாட்டிக் கொண்ட சர்வேஷ் என்ன செய்வதென்று தெரியாமல் முழித்துக் கொண்டிருந்தான் , ‘ நான் மட்டும் இப்போ இந்த இடத்தைவிட்டு போகலைனா  அப்பா கிட்ட திட்டு வாங்குவேன் ? எப்படி  இங்கிருந்து போறது ? ‘ என்று மனம் புலம்ப ,

திடீரென்று பல்பு எரிய தன் போனில் பாட்டை ஆன் செய்த சர்வேஷ் போன் வருவதுப் போல் பாட்டை நிறுத்தி , ” ஹலோ தேவ் , என்ன டா ? இரு டா நெட்வொர்க் ப்ராப்ளமா இருக்கு இன்டர்நேஷனல் காலாக இருப்பதால் . நான் வெளியே வந்து பேசுறேன் . ” என்று போனில் தனியாக பேசிக் கொண்டிருந்த சர்வேஷ் , ” எக்ஸ்க்யூஸ் மீ .  ” என்று தமிழன்பனிடம் சொல்லியவன் விட்டால் போதும் என்று  வெளியே ஓடிவிட்டான் .

” நம்மை தனியா விட மற்றவர்களைவிட உங்க அண்ணண் தான் அதிக சிரமம் பட்டுட்டாங்க . ” என்றான் தமிழன்பன் .

சத்தமாகவே சிரித்தாள் தீப்ஷீ .

” நீங்க சிரிச்சா ரொம்ப அழகாக இருக்கீங்க . ” என்றான் தமிழன்பன்.

” தேங்க்ஸ் . ” என்ற தீப்ஷீயின் நினைவு ரூமில் சத்யா சொன்னதை தான் ஞாபகப்படுத்தியது , ஈ என்று சிரித்தால் மாப்பிள்ளை ஓடிவிடுவார் . கஷ்டப்பட்டு சிரிப்பை அடக்கினாள் தீப்ஷீ .

” நாம இதுக்கு  முன்ன பார்த்திருக்கோம் ஞாபகம் இருக்கா ? ”  என்றுக் கேட்டான் தமிழன்பன் .

” அமர் அங்கிள் வீட்டு ஃபங்ஷன் அப்போ நாம் பார்த்திருக்கோம் . ” என்றாள் தீப்ஷீ .

” அப்போ நாம சின்ன பசங்க . எப்படி ஆட்டம் போட்டோம் . ” என்றான் தமிழன்பன் .

ஆம் என்று தலை ஆட்டினாள் தீப்ஷீ .

” உன்ன பத்தி சொல்லு ‌‌. ” என்றான் தமிழன்பன் .

இருவரும் மற்றவரை புரிந்துக் கொள்ள முயற்சி செய்துக் கொண்டிருக்க சத்யாவோ,

****

பைக்கை எடுத்த சத்யா சென்றது தமிழன்பன் வேலை செய்யும் இடத்துக்கு தான் .

உள்ளே சென்றவன் , அங்கு வேலை செய்துக்கொண்டிருந்த கிளார்க்கிடம் சென்றான் , ” சார் எனக்கு ஹோம் லோன் கொஞ்சம் அவசரமா தேவை , மேனேஜரை கூட நல்லா கவனிக்கிறேன் . ”  என்றான் சத்யா .

” தமிழன்பன் சார் கை ரொம்ப சுத்தம் , அவருக்கு அதெல்லாம் பிடிக்காது . அதுவும் இல்லாம அவரு இன்னைக்கு லீவ் . உனக்கு அசிஸ்டன்ட் மேனேஜர் தான் சரியா வருவார் . அவர் ரூம் அங்கிருக்கு உள்ளே போய் பார் . ”  என்றார் .

அனுமதிப் பெற்று உள்ளே வந்த சத்யா,  அசிஸ்டன்ட் மேனேஜரிடம் லோன் பத்திக் கேட்டான் . அப்போது அவர் எல்லா விபரங்களையும் சொன்னவர் மேலும் சத்யா எதிர்ப்பார்த்த தகவலையும் சொனானார் , ” தமிழன்பன் நேர்மையான ஆள் , அவர் கிட்ட நாம கொஞ்சம் ஜாக்கிரதையா தான் இருக்கணும்.  ” என்றார் .

ஒருவழியாக அவரை சரி செய்து வெளியே வந்த சத்யா அங்கு நின்றிருந்த செக்யூரிட்டியிடம் , ” தமிழன்பன் எப்படி  ? ” என்றுக் கேட்டான் .