உயிர்ப்பாங்கி நண்பேன் டா 4

அத்தியாயம் 4

” சத்யா …… ” கமலா .

” என்ன கமலாமா ? ” .

” நானும் ஸ்கூல் விட்டு வந்ததிலிருந்து பார்க்கிறேன் . நீ ரொம்ப கவலையா இருக்க . ஸ்கூல்ல எதுவும் பிரச்சனையா ? ” .

” ஒன்னுமில்ல கமலாமா ” என்று சத்யா கூறும்போதே அவன் குரல் விசும்ப ஆரம்பித்தது .

அழுகையை கட்டுபடுத்த முயற்சிக்கிறான் என்பது புரிய . மேலும் அவனை கஷ்டப்படுத்த விரும்பாமல் , ” சரி … போய் முகம் கழுவி வா பா ” என்றார் கமலா .

” சத்யா ….. கமலாமா ….. ” என்று கத்திக் கொண்டே வந்தாள் தீப்ஷீ .

” வா ..  டா குட்டி . என்ன டிரஸ் கூட மாற்றாமல் வந்திருக்கீங்க ” என்றுக் கேட்டார் கமலா .

” கமலாமா … சத்யா என் கூட பேசமாட்டேன்றான் . அதான் ஏன் என்று கேட்டுட்டுப் போக வந்தேன் ”  என்றாள் தீப்ஷீ .

” சரி டா . இங்க உட்காரு சத்யா வருவான் . நான் போய் இரண்டு பேருக்கும் பால் எடுத்துட்டு வரேன் ” .

ஃபிரஷ்ஷாகிட்டு வெளியே   வந்தான் சத்யா. அங்கு தீப்ஷீ இருப்பதை பார்த்தும் எதுவும் பேசாமல் , ஷோபாவில் உட்கார்ந்தான்  .

” சத்யா …. “

அவன் திரும்பவே இல்லை .

” சத்யா …..  என்மேல் என்ன கோபம்  ? என் கூட பேசமாட்டியா ? ” .

பதில் இல்லை சத்யாவிடம் . எழுந்து சமையலறை சென்றாள் தீப்ஷீ .

” கமலாமா … நீங்க வந்து என்னன்னு கேளுங்க . ” .

” இருமா பால் எடுத்துட்டு வரேன் ” .

” இல்லை . இப்பவே வாங்க ” என்று அவர் கையை பிடித்து இழுத்தாள் .

” இரு டா அடுப்பை நிறுத்திட்டு வரேன் . ” என்றவர் வேகமாக அடுப்பை நிறுத்த ,

அவரை இழுத்து வந்து சத்யா முன் நிற்க வைத்தவள் , “என்னன்னு கேளுங்க கமலாமா. ? ” .

” ஏன் சத்யா நம்ம தீபு குட்டிக்கிட்ட பேசமாட்டேங்கிற ? “

” எனக்கு பிடிக்கல கமலாமா ” என்றான் சத்யா .

” ஏன் பா அப்படி சொல்லுற ? “

” கமலாமா … இன்னைக்கு ஸ்கூல இவள் அண்ணனின் நண்பன் அந்த தேவ் , எல்லார் முன்னாடியும் எனக்கு யாரும் இல்லை என்று சொல்லி கேலி செய்தான் . இவள் அண்ணனும் அதற்கு கூட்டு தான் . அதனால் எனக்கு இவள் நட்பு இனி தேவை இல்லை ” என்றான் கோபமாக  .

” சத்யா … அதுக்கு நீ அவங்க இரண்டு பேரு கூடதான் பேசாமா இருக்கணும் . ஏன் தீபு கூட பேசமாட்டேன்ற ? ” .

” சத்யா …. எனக்கும் தேவ்வ பிடிக்காது . அவன் எப்பவும் என்னை கிண்டல் செய்வான் . அண்ணனும் என்னை திட்டுவான்.  நீ தான் எனக்கு கிடைத்த ஃப்ரெண்டு . நான் உன்னை கிண்டல் செய்ய மாட்டேன் . என்னோடு பேசு சத்யா ” .

” ஆமாம் சத்யா . உன்னோட அம்மா அப்பா செய்த தவறுக்கு நீ எந்த தவறும் செய்யாமல் தண்டனை அனுப்பவிக்கிற. அது போல் எந்த தவறும் செய்யாத தீபுக்கு நீ  தண்டனை தந்துடாதே சத்யா ” என்றார் கமலா.

சத்யா யோசித்தான் , ‘ கமலாமா சொல்வது சரியே . நான் தவறு செய்யவில்லை அதுபோல் தீப்ஷீயும் தவறு செய்யவில்லை ‘ என்று நினைத்தான்

” தீபு ….. அப்போ ஒரு கண்டிஷன் . நீ இனிமேல் தேவ் கூட பேச கூடாது , ஃப்ரெண்ட்ஷிப் வைத்துக்கொள்ள கூடாது ” என்றான் சத்யா .

” சரி சத்யா . எனக்கும் ஒரு கண்டிஷன் இருக்கு . நீ என் கூட இனி எப்பொழுதும் சண்டை போடக் கூடாது ” என்றாள் தீப்ஷீ .

” இனிமே எப்பவும் உன் கூட சண்ட போட மாட்டேன் அம்மு ” சத்யா . ‘

#####

அம்முவின் குரலில் நினைவுகளிலிருந்து மீண்டு வந்தான்

” நீ என்ன சொன்னாலும் இந்த விஷயத்தில் நான் மாற மாட்டேன் சத்யா . பிரின்ஸ்பால் மேடம் கிட்ட அவன் உன்ன பத்தி ஏதோ கிண்டலாக சொன்னான் தானே ?  அவனின் நக்கல் பார்வையும் , சிரிப்பையும் நான் தான் பார்த்தேனே  . இல்லை என்று உன்னால் சொல்ல முடியுமா சத்யா “

சத்யா வாயடைத்து நின்றான் . அவனால் பதில் சொல்ல முடியவில்லை , ” சரி வா வீட்டுக்கு போவோம் ” என்றான் சத்யா .

‘ சத்யா மேல் உள்ள அன்பு இன்னும் குறையவே இல்லை அது போல் என் மேல் உள்ள வெறுப்பும் குறையவில்லையா செல்லம் ‘ என்று தீப்ஷீயோடு மனதில் உரையாடினான்  தேவ் .

‘ நான் உன் நண்பனை காயப்படுத்த வேண்டும் என்று அவ்வாறு பேசவில்லை . நான் சாதாரணமாக பேசியதுக் கூட உனக்கு தவறாக தெரிகிறது பெண்ணே ! ‘ என்று வருந்தினான் தேவ் .

பைக்கில் ஏறியவன் ஹெல்மெட்டை போட போக அப்போது தான் நினைவு வந்தவனாக திரும்பி தீப்ஷீயை பார்த்தான் .

” அம்மு உன் ஹெல்மெட் எங்கே ? ” .

” சத்யா , நான் காலைல காரில் வந்ததால் எடுத்துட்டு வரல ” .

பைக்கில் இருந்து கீழே இறங்கியவன் ஹெல்மெட்டை தீப்ஷீக்கு போட்டுவிட்டான் .

” சத்யா , எனக்கு வேண்டாம் , நீ போட்டுக்கோ ” .

” அம்மு நீ போட்டுக்கோ ” என்றவன் மீண்டும் பைக்கில் ஏறி வண்டியை ஸ்டார்ட் செய்தான் .

கல்லூரியில் இருந்த மாணவர்கள் , சத்யாவை ஆச்சரியமாக பார்த்தனர் . இதுவரை தேவை இல்லாமல் எந்த பெண்ணோடும் சத்யா பேசியதில்லை .

அவன் பின்னால் சுத்தாத பெண்களே இல்லை இருந்தும் அவன் யாரையும் கண்டுக் கொண்டதில்லை . அப்படிபட்டவன் இன்று ஒரு பெண்ணை பைக்கில் அழைத்து செல்வதை சந்தேகமாக தான் பார்த்தனர் .

சத்யாவின் செயலை பார்ததவன் , ‘ இவர்களின் நட்பு என்றுமே மாறாது . தீப்ஷீ மேல் சத்யா வைத்து உள்ள அன்பை பார்க்கும் போது எனக்கு பொறாமையாக இருக்கு ‘ , என்று நினைத்துக் கொண்டே தேவ் அவர்களை பின் தொடர்ந்தான் .

 “சத்யா , எனக்கு குல்பி வேண்டும் ” .

” அம்மு  இந்த மாதிரி டைம்ல நீ தலை குளிப்ப . அதனால குல்பி வேண்டாம் ” .

” சத்யா , அந்த தேவ்வை பார்த்ததிலிருந்து ஒரே டென்ஷன் . குல்பி சாப்பிட்டால் தான் நான் கூலாவேன் ” .

” அம்மு , செல்லக்குட்டி தான சொன்னா கேக்கணும். அடம் பிடிக்கக் கூடாது ” .

” சத்யா , எனக்கு குல்பி வேண்டும் ” கொஞ்சம் அழு குரலில் கேட்டாள் .

வண்டியை  யூ டேர்ன் எடுத்தவன் , பாம்பே குல்பி ஐஸ்கிரீம் ஷாப்பில் வண்டியை நிறுத்தினான் .

” வா அம்மு ” என்று அவளை அழைத்துச் சென்றான் .

” அண்ணா இரண்டு குல்பி ” என்று கடைக்காரிடம் ஆர்டர் கொடுத்தாள் தீப்ஷீ .

அவர் எடுத்து வந்த இரண்டு குல்பியையும் அவளே சாப்பிட்டாள் . இரண்டையும் சாப்பிட்டு முடித்தவள் , ” சத்யா , உனக்கு வேண்டுமா ? ” என்றுக் கேட்டாள் .

” அம்மு , ரொம்ப சீக்கிரமா கேட்டுட்ட . இரண்டு குல்பி உள்ளே போனதும் தான் நான் உனக்கு தெரிகிறேனா ” என்றுக் கேட்டான் சத்யா.

அசடு வழிந்தாள் தீப்ஷீ . ” எனக்கு வேண்டாம் அம்மு , வா போகலாம் ”   என்றான் சத்யா .

” சத்யா , எனக்கு ஒரே ஒரு பாட் குல்பி ” , என்றாள் தீப்ஷீ .

” அம்மு நோ ” .

” சத்யா , ப்ளீஸ் ” .

” சரி நான் வாங்கி தருகிறேன் , நான் என்ன சொன்னாலும் செய்வியா ” .

” சத்யா , நீ இப்படி செல்ஃபிஷ்ஷா மாறுவ என்று நான் நினைக்கவே இல்லை . நீ வாங்கி தந்தால் தான் நீ சொல்வதுப் போல நான் செய்கிறேனா ” என்றாள் தீப்ஷீ கோபமாக .

‘ ஏன் இப்படி சத்யா சொல்கிறான் ? இவன் அவளை தொல்லை செய்கிறானோ ? ‘  என்று நினைத்துக் கொண்டு கோபமாக அங்கு நடப்பதை பார்த்துக் கொண்டிருந்தான் தேவ் .

” நீ கோபப்படுறதுக்கெல்லாம்  நான் ஒன்னும் பயப்பட மாட்டேன் . நீ ஆர்டர் கொடு.”

” அண்ணா , ஒன் பாட் குல்பி ” என்றாள் தீப்ஷீ .

அவள் சாப்பிட்டு முடிக்கும்வரை காத்திருந்தான் , ‘ இவள் இன்னும் பத்துக் குல்பி கூட அசால்டா உள்ள தள்ளுவாளோ ‘  என்று மனதில் நினைத்த சத்யா வெளியே , ” அம்மு நான் போய் பில் பே பண்ணிட்டு வரேன் ” என்றான் .

” சாப்பிட்ட பின் பே பண்ணலாமே சத்யா ” .

” இல்லை அம்மு , இப்பவே பே பண்ணுறேன். நேரமாகுது வீட்டிற்கு போகணும் ” .

‘ உஷார் ஆகிட்டியா சத்யா . உன்னை இன்னொரு நாள் நான் கவனித்துக் கொள்கிறேன் ‘  என்றது தீப்ஷீயின் மைண்ட் வாய்ஸ் .

வண்டியை ஸ்டார்ட் செய்த சத்யா , நேராக சென்றது மெடிக்கல் ஷாப்பிற்கு . இறங்கியவன் போய் அவளுக்கான இருமல் டானிக் மற்றும்  மாத்திரை வாங்கி வந்தவன் அவள் கையில் கொடுத்தான் .

” அம்மு , சொன்னது ஞாபகம் இருக்குல . நைட் ஒழுங்க மாத்திரை , மருந்தை சாப்பிட வேண்டும் ” என்றான் சத்யா .

கோபமாக பெற்றுக் கொண்டவள் , வேறு பக்கம் திரும்பிக் கொண்டாள் . அவள் போனிடெயிலை பிடித்து இழுத்து அவளை வம்பிழுத்தான் சத்யா .

” சத்யா , தலையில் கை வைக்காதே ” .

” வச்சா என்ன டி பண்ணுவ ” . சத்யா , தீப்ஷீயை வம்பிழுக்கும் போது மட்டும் அரிதாக சத்யா டி என்ற சொல்லை பயன்படுத்துவான் அது புரிந்த தீப்ஷீ , ” சத்யா , எனக்கு வலிக்குது ” என்று அழு குரலில் கூறினாள் .

சத்யாவின் வீக்னஸ் தீப்ஷீ சோகமாக கூறினாளே போதும் அவன் மறு வார்த்தை பேசாமல் அவள் விரும்பியதுப் போல் செய்து விடுவான் .

” சாரி அம்மு ”  என்றவன் பைக்கில் ஏறி வீட்டை நோக்கி சென்றான் .

” அடப்பாவிகளா , இதுக்கா இவ்வளவு பில்டப் . நான் சொல்வதை எல்லாம் செய்ய வேண்டும் என்று . கொஞ்ச நேரத்தில் என் பீபியை அதிகப்படுத்தி , மனுஷனை சாகடிச்சிட்டீங்க ” என்று தேவ் அவன் காரில் சத்தமாக புலம்பினான் .

ஒருவழியாக மூவரும் வீடு வந்து சேர்ந்தனர் . சத்யா , தீப்ஷீ இருவரும் சத்யா வீட்டிற்கு சென்றனர் .

அதை பார்த்த தேவ் , ‘ இவளுக்கு வேறு வேலையே இருக்காதுப் போல . சத்யாவோடு இருப்பதை தவிர ‘ என்று நினைத்தவன் . நேராக தன் வீட்டிற்கு சென்றான்.

” வா பா தேவ் , காலேஜ் முதல் நாள் எப்படி போனது பா ? ” என்றுக் கேட்டார் இந்திராணி .

” ரொம்ப நல்லா இருந்தது நானி ” என்றவன் நேராக அவன் ரூம் சென்று ரெப்ஃப்ரஷ் செய்துக் கொண்டு மீண்டும் ஹாலிற்கு வந்தான் .

அவனுக்கு டீ மற்றும் ஸ்நாக்ஸ் எடுத்து வந்த அக்ஷிதா , ” எப்படி பா புது காலேஜ் இருந்தது ” என்றுக் கேட்டார்  .

” சூப்பராக இருந்தது மா உங்களை போல…  ”  என்றான் தேவ் .

முன்பு போல் இல்லாமல் தேவ் இப்போது அன்பாக பேசுவது அக்ஷிதாவின் மனதை குளிர்வித்தது  . அவனை ஹாஸ்டலில் சேர்த்து , அவனை பிரிந்து இவர் விட்ட கண்ணீருக்கு இறைவன் பதில் தந்துவிட்டதாகவே அக்ஷிதா நினைத்தார் .

” உங்க அம்மா சூப்பர்னா, நான் சுமாரா ” என்று இந்திராணி போருக்கு தயாரானார்  .

” ஐயோ ! இல்ல நானி , நீங்க ரொம்ப சூப்பர் . எங்க அம்மா வெறும் சூப்பர் ”  என்ற தேவ் , அக்ஷிதாவை பார்த்து கண்ணடிக்க . அக்ஷிதா சிரித்துக் கொண்டே உள்ளே சென்றார் .

” என்னோட ராஜா ” என்ற இந்திராணி , தேவ்வை அணைத்துக் கொண்டார் .

அங்கே உட்கார்ந்திருந்த அமர் , ‘ ஓஹோ ! இது தான் ஒரே கல்லில் இரு மாங்காய் அடிப்பதுப் போல் . இது தெரியாமல் நான் மனைவி மற்றும் அம்மாவிடம் படும்பாடு இருக்கே . ஆனா தேவ் , நீ சரியான கேடி டா ‘ என்று நினைத்துக் கொண்டே அமைதியாக தேவ்வை பார்த்தார் .

அப்பாவின் மைன்ட் வாய்ஸ் புரிந்த தேவ் , அவரை பார்த்து தன் அக்மார்க் நக்கல் சிரிப்பை சிரித்து வைத்தான்.

” அம்மா நான் சர்வேஷ் வீட்டிற்கு போயிட்டு வரேன் ” என்றான் தேவ் .

” சரி பா ” .

சர்வேஷ் வீட்டின் காலிங் பெல்லை அழுத்தி, காத்திருந்த தேவ் , ‘ தீப்ஷீ வந்து கதவை திறக்கணும் ‘ என்று மந்திரம் போல் பலமுறை மனதில் சொல்லிக் கொண்டே இருந்தான்.

அவன் வேண்டுதல் பலித்தது போல் . தீப்ஷீ வந்து கதவைத் திறந்தாள் . அங்கு தேவ்வை பாரத்ததும் அவள் கண்கள் வெறுப்பைக் காட்டியது .

அதைப் பார்த்த தேவ் மனதிற்குள் , ‘ என்னை பார்த்ததும் உன் முகம் ஏன் இப்படி போகுது . இதே அந்த சத்யாவை பார்த்திருந்தால் பல்லை காண்பித்திருப்ப தானே . இருடி நீ செய்கின்ற செயல் அனைத்திற்கும் ஆன விலையை நீ தான் தர போற . உன்னிடம் வட்டியும் முதலுமாக எல்லாம் பெற்றுக் கொள்வேன் நான் ‘ என்று நினைத்துக் கொண்டான் .

” யார் தீபு ? ”  என்றுக் கேட்டுக் கொண்டே வந்தான் சர்வேஷ் .

அங்கு தேவ் நிற்பதை பார்த்து . ” தீபு , தேவ்வை உள்ளே வா என்று கூப்பிடாமல் , அவனை உள்ளேயும் விடாமல் ஏன் இப்படி நின்றுக் கொண்டிருக்க . முதல்ல நகரு . ” என்றான் சர்வேஷ் .

” உள்ள வா டா தேவ் ” என்று அவன் கையை பிடித்து அழைத்து வந்தான் சர்வேஷ் .

” சத்யா வந்தா நீ ஒரு நாளாவது வா அப்படினு சொல்லியிருக்கியா ? இல்லை தானே… அப்புறம் நான் மட்டும் சொல்லணும் என்று எதிர்பார்க்காதே ”  என்ற தீப்ஷீ தன் அறைக்கு சென்றுவிட்டாள் .

‘ சரியான சண்டைக்காரி. அராத்து. ‘  என்று நினைத்துக் கொண்டான் தேவ் .

” அவ கிடக்குறா . நீ வந்து உட்காரு தேவ் ”  என்ற சர்வேஷ் . சத்தமாக,  ” அம்மா , அப்பா , தேவ் வந்திருக்கான் ” என்றான் .

இருவரும் ஹாலிற்கு வந்தனர் . ” வா பா தேவ் . நல்லாயிருக்கியா ? உன்னை டிவியில் பார்த்தேன் , சர்வேஷ் தான் காண்பித்தான் ”  என்றார் சரண்யா . மிகவும் அன்பானவர் , படத்தில் வரும் அப்பாவி சரண்யா அம்மாவை போல இவரும் அப்பாவி .

” நான் நல்லாயிருக்கேன் ஆன்ட்டி . நீங்க எப்படி இருக்கீங்க ? ” என்றான் தேவ் .

” நான் நல்லாயிருக்கேன் தேவ் . டீ எடுத்துட்டு வரேன் “

” வேண்டாம் ஆன்ட்டி , இப்போ தான் குடிச்சிட்டு வரேன் ” .

” சரி அப்போ டின்னர் இங்க சாப்பிடணும் . நான் போய் ரெடி செய்கிறேன் ” என்றவர் . தேவ்வை மறுப்பு சொல்ல விடாமல் சமையலறை நோக்கி சென்றார் சரண்யா .

”  எங்களை மறந்திருப்ப என்று நினைத்தேன் தேவ் . ஆனா , நீ எங்களை பார்க்க வந்தது சந்தோஷமா இருக்கு பா ” என்றார் தினேஷ் . சரண்யாவை போல் இல்லாமல் மிகவும் கண்டிப்பானவர் .

” நான் எப்படி அங்கிள் உங்களை எல்லாம் மறப்பேன் . சர்வேஷ் தான் என் உயிர் தோழன் இன்று வரை ” என்றான் தேவ் .

” நான் நினைத்தது போல் விளையாட்டில் நீ பெரியாளாக வந்துட்ட. டைக்குவாண்டோ சாம்பியன் ப்ளேயர் எங்களோட நெய்பர்னு சொல்லிக்கவே பெருமையா இருக்கு ”  என்றார் தினேஷ் .

‘ வெறும் நெய்பர் இல்லை உங்கள் வருங்கால மாப்பிள்ளை ‘  என்று மனதில் நினைத்த தேவ் வெளியில் , ” இன்னும் டைக்குவாண்டாவில் நான் எதுவும் பெருசா சாதிக்கல அங்கிள் . இன்னும் நான் அதுக்கு பல போட்டியில் வெற்றிப் பெற வேண்டும் ” என்றான் தேவ் .

” கண்டிப்பா நீ வெற்றி பெறுவ தேவ் ” என்றார் தினேஷ் .

பின் மூன்று ஆண்களும் சேர்ந்து அரசியல் , பொருளாதாரம் , நாட்டு நடப்பு என்று அலசி ஆராய்ந்தனர் .