ரகசியம் – 81
நடந்ததை சுருக்கமாக மதுரன் அங்கு கூறிமுடிக்க ராமானுஜமோ,
“நான் கொஞ்சம் பேசலாமா” என்க அனைவரும் அப்பொழுது தான் அவரையும் குறித்து யோசித்தனர். சத்யனோ வேகமாக அவரை நோக்கி சென்றவர்,
“அயோ சார்.. மன்னிச்சுருங்க.. இவ்ளோ பெரிய குழப்பம் நடந்தனால உங்கள பத்தி யோசிக்காம விட்டுட்டோம்.. என் பையன் செஞ்சது தப்பு தான்.. உங்கள கேட்காம உங்க பொண்ணக் கேட்காம அவ கழுத்துல தாலி கட்டுனது தப்பு தான்.. வேற வழியில்லாம பண்ணிட்டான்.. அது மட்டும் நடக்கலைன்னா பிரச்சனை வேற மாதிரி போயிருக்கும்.. மதுவும் மாறனும் அண்ணன் தங்கச்சின்னு தெரியாம நாங்களே ஒரு கீழ்த்தரமான வேலைய பார்த்த மாதிரி ஆயிருக்கும்.. அந்த பாவத்துல இருந்து தெரிஞ்சோ தெரியாமையோ உங்க பொண்ணு எங்களைக் காப்பாத்திருக்கா.. கண்டிப்பா உங்க மகளை எங்க வீட்டு பொண்ணா பார்த்துக்குறோம் சார்.. எங்களை மன்னிச்சுருங்க” என்று சத்யன் அவர் போக்கில் பேசிக்கொண்டே போக இனியா, அறிவு, மதுரன், மதுரிகா மற்றும் விழி ஐவரும் பதற்றமாய் ராமானுஜம் கூற போகும் பதிலுக்காக காத்திருந்தனர். ராமானுஜமோ,
“நீங்க இவ்ளோ பேசணும்னு எந்த அவசியமும் இல்ல சம்மந்தி.. மாறன் தம்பி நேத்து ராத்திரியே என்னை சந்திச்சு நடந்த விஷயம் எல்லாத்தையும் சொல்லி.. உங்க பொண்ணு கழுத்துல தாலி கட்ட எனக்கு அனுமதி கொடுப்பீங்களான்னு கேட்டு என் சம்மதத்தோட தான் தாலி கட்டிருக்காரு..” என்று கூற அனைவர்க்கும் அடுத்த ஆச்சர்யம். விழியோ அதிர்ந்து மாறனை நோக்க அவனோ ஆம் என்று தலையசைத்தான்.
“அதனால எனக்கு இதுல எந்த அட்சேயபனையும் இல்ல” என்று ராமானுஜம் கூறிமுடிக்க மாறனோ விழியின் காதருகில் குனிந்து,
“இது தெரியாம மேடம் பாட்டுக்கு எங்கேயோ போறேன்னு கிளம்பியாச்சு.. என்ன” என்று கேட்க தன்னவன் மூச்சு காற்று தன் காதுமடலை திடிரென்று உரசியதும் சற்று தடுமாறிய பெண்ணவள் பின் சுதாரித்து,
“எப்படினாலும் என் மேல உங்களுக்கு காதல் இல்ல தான” என்று கேட்க அவனோ அதற்கு பதில் கூறவில்லை. பிறகு மருத்துவர் வந்து மீண்டும் வசீகரனைப் பரிசோதித்து விட்டு,
“இப்போ இன்னும் நல்ல பெட்டர் ஆகிருக்காங்க.. வீட்டுக்கு அழைச்சுட்டு போங்க.. மத்த கண்டிஷன்ஸ் பத்தி ரெண்டு நாள்ல வீட்டுக்கே வந்து டெஸ்ட் பண்ணி சொல்றோம்” என்க பிறகு வசீகரனை வீட்டிற்கு அழைத்து வந்தனர். வந்ததும் வசீகரனோ விஜயாவை அழைத்து மதுரன் மற்றும் மதுரிகாவின் திருமணம் குறித்து திக்கித்திணறி பேச ஆரம்பித்தார்.
“விஜிமா.. நான் சாகுறதுக்குள்ள என் பையன் கல்யாணத்தைப் பாத்துடுறேனே” என்று கண்கலங்கி கூற மதுரன் மதுரிகாவை நோக்க அவளோ எதுவும் கூறாமல் தலைக் குனிந்தாள். அதனைக் கண்டவன்,
“ஒரு நிமிஷம்.. நானும் மதுவும் கொஞ்ச பேச வேண்டியிருக்கு.. இதோ வந்துடுறோம்” என்றபடி மதுவை அழைத்து கொண்டு தன் அறைக்கு சென்று கதவினைத் தாளிட்டான்.
மது அவனைக் கேள்வியாக நோக்க அவளருகில் வந்தவன் அவளின் கன்னங்களைத் தன் கையில் ஏந்தி,
“என்ன தான் டி உன் பிரச்சனை.. முதல்ல என் மேல காதல் இருந்தும் உன்னைக் காப்பாத்துனவன் மேல தான் காதல் இருக்குன்னு எதையோ மனசுல நெனச்சுட்டு என் காதலை ஏத்துக்க முடியாம ரகசியமா தவிச்ச.. அப்புறம் ஒருவழியா காதலை சொல்லி சேர்ந்த ஒரு வருஷத்துல நான் உன்னைவிட்டு காரணம் சொல்லாம போன அப்புறமும் என்னை மறக்காம என்னையே நெனச்சுக்கிட்டு ரகசியமா தவிச்ச.. அப்புறம் என் அப்பா பத்தின விஷயத்தைத் தப்பா புரிஞ்சுட்டு என்னை வெறுக்கவும் முடியாம மறக்கவும் முடியாம ரகசியமா தவிச்ச.. இப்போ எல்லாம் பிரச்சனையும் முடிஞ்ச அப்புறமும் என்னை நம்பாம விட்டியேன்னு நீயே குற்ற உணர்வா நெனச்சு என்னைவிட்டு போய் மறுபடியும் ரகசியமா தவிக்க முடிவு பண்ணிட்டல..
ஏன் டி.. அப்படி பார்த்தா என் மேலயும் தப்பு இருக்கு.. பானு அம்மாக்கு பொறந்தவ தான் நீன்னு நெனச்சு உன்ன வேணாம்னு முடிவு பண்ணி உன்னை அவாய்ட் பண்ணி உன்னயும் தவிக்கவிட்டு காயப்படுத்துனேன்.. அப்போ எனக்கும் தான் குற்ற உணர்வா இருக்கனும்.. அப்போ ஒன்னு பண்ணு.. நீ வேற ஒரு வாழ்க்கையைத் தேடி சந்தோஷமா இரு.. நான் உன்ன விட்டு போயிடுறேன் சரியா..” என்றவனின் கண்கள் கலங்கி கண்ணீர் வடிந்து மதுவின் கன்னத்தை சுட்டது. அவளோ அவனை இறுக்கி அணைத்து கொண்டு,
“இல்ல டா.. நீ ஏன் டா போகணும்.. நீ சந்தோஷமா வாழனும் டா.. உன்ன நம்பாம விட்டது நான் தான… நான் தான் போகணும்” என்று தேம்ப,
“நீ என்னைவிட்டு போன அப்புறம் நான் இன்னொரு வாழ்க்கையை தேடிப்பேன்னு நீ நெனைக்குறியா..” என்று கேட்டவன் அவளின் விழியைப் பார்க்க அவளின் விழியிலோ, “மாட்டியா” என்ற கேள்வியை தேக்கி வைத்திருந்தாள். அதனைப் பார்த்தே உணர்ந்தவன்,
“கண்டிப்பா மாட்டேன்.. உன்ன நெனச்சுட்டு மட்டும் தான் வாழ்வேன்.. அப்படி நானும் நீயும் ஒருத்தருக்கொருத்தர் நெனச்சுட்டு எங்கேயோ வாழுறதுக்கு நாம ஒண்ணா சந்தோஷமா வாழலாம் டி.. இங்க பாரு நீ என்னை நம்பாததுக்கு உன் மேல எனக்கு எந்த கோவமோ வருத்தமோ இல்ல.. தெரியாம செஞ்ச தப்பு டி அது.. ஆரம்பத்துல இருந்தே உன்மேல உள்ள காதல் அப்படியே தான் டி இருக்கு.. எப்போவும் மாறாது.. கூட வேணும்னா செய்யுமே தவிர குறையாது.. அன்னைக்கு ஏர்போர்ட்ல ரெண்டு பேரும் எவ்ளோ தவிச்சோம்.. அதை எல்லாம் மறந்துட்டு நான் இன்னொரு வாழ்க்கையை தேடிப்பேன்னு நீ எப்படி டி நினைக்கலாம்.. என்னைவிட்டு போக நினைக்காத டி” என்று கெஞ்ச அவன் மனவலியை உணர்ந்த மது,
“நான் போகமாட்டேன் டா.. என்னை மன்னிச்சுரு.. நான் ஒவ்வொரு தடவையும் இப்படி முட்டாள்தனமா முடிவெடுக்கும் போதும் என்னைத் திருத்த நீ கண்டிப்பா வேணும்.. நான் போக மாட்டேன்..” என்றவள் அவன் நெஞ்சில் முகம் புதைத்து அணைத்துக் கொண்டாள். அவனும் விட்டால் சென்றுவிடுவாள் என்பது போல் இறுக அணைத்துக் கொண்டான். பிறகு தன் தலையை நிமிர்த்தியவள் அவன் கண்களோடு தன் கண்களைக் கலக்க விட்டு,
“மறுபடியும் உன்ன காயப்படுத்த தான நான் பார்த்துருக்கேன்.. ” என்க அவளின் கன்னம் தாங்கியவன்,
“ஆமா ரொம்பவே.. அதுவும் என்னை வார்த்தையால நிறையவே காயப்படுத்திட்ட.. இந்த வாயில இருந்து தான அந்த வார்த்தை எல்லாம் வந்துச்சு..” என்றவன் அவள் இதழ்களை தன் விரலால் வருடி, “அதுக்கு நானே தண்டனைக் கொடுக்குறேன்” என்றவன் அதனை தன் இதழால் சிறைப்பிடித்தான். இதனைப் பெண்ணவள் சற்றும் எதிர்பாராதிருக்க அவனது திடீர் தாக்குதலில் முதலில் தத்தளித்தவள் பிறகு அவனுக்கு தன் இதழைத் தத்துக் கொடுத்தாள்.
சில நிமிடங்களில் முத்த போராட்டங்கள் முடிவுக்கு வர அவளோ வெட்கத்தில் வெளியே ஓடிப்போக பார்க்க,
“ஹே இரு டி ஒரு நிமிஷம்” என்றவன் தன் கைக்குட்டையால் அவள் இதழில் அவனால் கசிந்திருந்த ரத்தத்தைத் துடைத்துவிட்டு இறுக்கி அணைத்ததில் கசங்கியிருந்த ஆடையை சரிசெய்துவிட்டு அவளின் கரம் பற்றி,
“என்ன கல்யாணம் பண்ணிக்குறியா மிஸ் பண்டாரம்” என்று கேட்க அவளோ,
“யோசிச்சு சொல்றேன் மிஸ்டர் போர்க்யூபைன் மண்ட” என்று கூற அவனோ,
“ஆஹான்.. ஆனா நாம தான் ஆல்ரெடி கல்யாணம் பண்ணிக்கிட்டோமே” என்க அவள் முழிக்க பின் நியாபகம் வந்தவள்,
“அட ஆமால.. ” என்றாள். அவனோ,
“ஆமாவே தான்.. அதனால….” என்று இழுக்க அவளோ,
“அதனால..” என்று கேள்வியாய் பார்க்க அவனோ,
“அதனால” என்று அவளை நெருங்க,
“போடா போர்க்யூபைன் மண்ட” என்றவள் அவன் பிடியில் சிக்காமல் வெளியே வந்தாள். பெரியவர்கள் அனைவரும் வசீகரனின் அறையில் இருக்க மதுவும் மதுரனும் ஹாலுக்கு வர அங்கிருந்த இளைஞர்கள் நால்வரும் மதுரனின் கோலம் கண்டு சிரித்துக் கொண்டனர். அதனைப் பார்த்து புரியாமல் விழித்த மதுவோ தன்னவனைப் பார்க்க அவனின் கலைந்த கேசமும் அவன் இதழில் இருந்த தனது உதட்டு சாயமும் கசங்கிய சட்டையும் உள்ளே நடந்ததை அப்பட்டமாய் தெரிவிக்க,
“அட கடவுளே” என்று அவனைத் திரும்ப வைத்தவள்,
“லூசு.. எனக்கு எல்லாத்தையும் சரி பண்ண நீ உனக்கு பண்ணியா டா” என்று கேட்க,
“ஹிஹி.. மறந்துட்டேன் மிஸ் பண்டாரம்..” என்று கூறி இளிக்க அவளோ அவன் தலையில் கொட்டியபடி சரி செய்துவிட்டாள். அறிவோ,
“டேய் மச்சான்.. இங்க ஒருத்தனுக்கு கல்யாணம் ஆகி மூணு நாள் ஆகுது.. அங்க ஒருத்தனுக்கு கல்யாணம் ஆகி பாதி நாள் ஆகுது.. நாங்களே இங்க அமைதியா நிக்குறோம்.. உனக்கு அதுக்குள்ள என்ன டா சேட்டை” என்று கேட்க மாறனோ,
“அதான.. அதுவும் அண்ணன் ஒருத்தன் நான் இருக்கேன்னு மரியாதையே இல்லாம என்ன வேலை இது” என்று மாறன் போலி முறைப்பில் கூற விழியோ,
“இதுக்கொண்ணும் குறைச்சல் இல்ல.. ஹ்ம்ம்” என்று மாறனை முறைத்துவிட்டு உள்ளே சென்றிட இனியாவோ,
“ஆமா இல்லனா மட்டும் நீ கிழிச்சுடுவ.. போடா டேய்” என்று அறிவிடம் சலிப்பாக கூறிவிட்டு விழியோடு சென்றுவிட மாறனோ,
“இதுங்க என்னடா நம்மள கழட்டிவிட்டு சிலுப்பிட்டு போதுங்க” என்று கேட்க அறிவோ,
“அதானே.. தப்பாச்சே.. நீ உன் ஆள தள்ளிட்டு போ.. நான் என் ஆள தள்ளிட்டு போறேன்” என்று விட்டு அவரவர் வீட்டம்மாவின் பின்னே சென்றனர்.
ரகசியம் – 82
“அன்பு.. அன்பு.. மிஸ்ஸஸ் அன்பினியா அறிவமுதன்..” என்று அவளின் பின்னே சென்ற படி அறிவு அழைக்க அவளோ,
“டேய் திருட்டுப்பயலே.. இப்போ எதுக்கு டா என் பேரை ஏலம் விட்டுட்டு இருக்க” என்று முறைக்க அவளின் கரம் பற்றி தடுத்தவன்,
“எதுக்கு அன்பு இப்போ கோச்சுக்கிட்டு வர.. நான் என்ன செஞ்சேன்” என்று பாவமாகக் கேட்க,
“நீ எதுமே செய்யலன்னு தான என் புலம்பலே” என்று தன் வாய்க்குள் புலம்ப அதனைக் கேட்டவன்,
“என்னது.. எதுவுமே செய்யலன்னு தான் கோபமா” என்று கத்த அவனின் வாயை மூடியவள்,
“டேய் இப்போ எதுக்கு டா இப்படி கத்துற”
“சாரி அன்பு.. ஒரு எக்ஸைட்மெண்ட்ல கத்திட்டேன்.. சரி நாம மேட்டருக்கு வருவோம்… நானா எதுவும் செய்யாம இருக்கணும்னு இருக்கேன்.. வீட்டுல தான இப்போ வேணாம் ஒருவாரம் போகட்டும்னு சொன்னாங்க.. அதுக்கு கட்டுப்பட்டு நான் எவ்ளோ நல்லபையனா இருக்கேன்.. நீ என்ன இப்படி கோச்சுக்குற” என்று பாவமாக கூற அவளோ அதனை அவனறியாமல் ரசித்துவிட்டு,
“ஆமா ஆமா ரொம்ப ரொக்கம் தான்.. டேய் அதுக்காக சிங்கிள் கிஸ் கூட கொடுக்காம என்னைக் காய விடுறியே” என்று இப்பொழுது வேண்டுமென்றே அவனுக்கு கேட்கும்படி கூற அவனோ,
“அன்பே.. இது தான் உன் பிரச்சனையா.. இப்போ பாரு” என்றவன் அவளை நெருங்க அவளோ,
“அய்ய.. துறை எல்லாமே சொல்லி தான் செய்வாராக்கும்.. ஒன்னும் தேவையில்லை.. நீ ஒருவாரம் சும்மாவே கிட” என்றவள் அவன் பிடியில் சிக்காமல் ஓடிவிட்டாள்.
‘அடிப்பாவி அன்பு.. நான் பாட்டுக்கு சிவனேன்னு தான டி இருந்தேன்.. இப்படி என்னை உசுப்பேத்திவிட்டு போயிட்டியே டி..’ என்று புலம்பியவன் வேறுவழியின்றி ஹாலுக்கு சென்றான். அங்கு விழியின் பின்னே சென்றவன்,
“ஹே பச்சைமிளகா நில்லு டி” என்க அவளோ கண்டுக்கொள்ளாமல் சென்றாள்.
“சொல்லிட்டே இருக்கேன் நீ பாட்டுக்கு போய்கிட்டே இருக்க” என்றவன் அவளின் கரம்பற்றி அருகில் இருந்த அறைக்குள் இழுத்து சென்றான்.
“ப்ச்.. என்னைவிடுங்க.. என்ன வேணும் உங்களுக்கு” என்று காட்டமாக கேட்க,
“அடியே இதை நான் தான் டி உங்கிட்ட கேட்கணும்.. உனக்கு என்ன பிரச்சனை இப்போ”
“சும்மா இந்த அடியேன்னு கூப்பிடுற வேலை எல்லாம் வேணாம்.. ஏதோ இஷ்டப்பட்டு தாலிகட்டுன மாதிரி தான்” என்க அவனோ,
“என் இஷ்டத்தை சொல்றியா.. உன் இஷ்டத்தை சொல்றியா..” என்று புருவம் சுருங்கி கேட்க,
“ரெண்டையும் தான்” என்றாள்.
“அப்போ உனக்கு இந்த கல்யாணத்துல இஷ்டம் இல்ல அப்படி தான” என்று கேட்க பதில் கூறாமல் நின்றாள். அவளின் கன்னம் பற்றியவன் அவளை தன்னைப் பார்க்கும் படி செய்து,
“சொல்லு டி.. உனக்கு இஷ்டம் இல்ல தான”
“ஆமா இஷ்டம் இல்ல தான்.. அதுவும் உங்கள பொறுத்தவரை இது கட்டாய கல்யாணம் தான”
“அப்படியா..” என்றவன் தனது பர்சில் இருந்து ஒரு சிறு காகிதத்தை எடுத்து அவளிடம் கொடுத்தான். அவளோ புரியாமல் அதனை வாங்கி பார்க்க அதில்,
“தேங்க்ஸ் ஃபார் மேக்கிங் மை டே வெரி ஸ்பெஷல் இளா.. பை இமைவிழி” என்று எழுதியிருக்க அதனைக் கண்டு கண்கலங்கியவள் அவனை அதிர்ந்து பார்த்தாள்.
ஆம் ஐந்து வருடங்களுக்கு முன் விழியின் பிறந்தநாள் அன்று அவள் அவனுக்காக எழுதி தலையணைக்குள் வைத்திருந்த காகிதம் அது. ஏனோ அன்று அதனைத் தூக்கி எரிய மனமில்லாமல் தன் பர்ஸினுள் வைத்திருந்தான். காரணமில்லாமல் அவ்வப்போது அதனை எடுத்தும் பார்த்துக் கொள்வான். ஏன் என்று அவனும் யோசிக்கவில்லை.. ஏன் என்று கேட்டால் அவனுக்கு பதிலும் தெரிந்திருக்க வாய்ப்பில்லை. அக்காகிதத்தைப் பார்த்தவள்,
“இது.. இது எப்படி இன்னும் உங்க கிட்ட” என்று கேட்க அவனோ,
“தெரியல.. இதைத் தூக்கி போட மனசு வரல.. அப்படியே வச்சுருக்கேன்.. இதையே தூக்கி போட மனசு வரலைனா.. கல்யாணம் பண்ணிட்டு உன்னைப் பிரிஞ்சு இருக்க எனக்கு எப்படி மனசு வரும்..” என்று அவன் கூற அவளோ மேலும் குழம்பினாள்.
“எனக்கு புரியல.. அப்போ நீங்களும் என்னை லவ் பண்ணீங்களா” என்று கேட்க அவள் கேள்வியில் கேலியாய் சிரித்தவன்,
“நீங்களும்னா என்ன அர்த்தம் மேடம்” என்று கேட்க அப்பொழுது தான் தான் உலறிக்கொட்டியது புரிந்தது.
“அது.. அது வந்து..” என அவள் சமாளிக்க காரணம் தேட அவனோ,
“இல்லாத மூளையை ரொம்ப கசக்காத.. எனக்கு எல்லாம் தெரியும்..” என்க மீண்டும் பெண்ணவள் அதிர்ந்தாள்.
“என்ன சொல்றீங்க”
“நேத்து என் அம்மா கிட்ட சத்தியம் பண்ணிட்டு வெளிய வரும் போது.. உன் கண்ணுல இருந்த கண்ணீரைப் பார்த்தேன் இமை.. அதுல எனக்கான காதலும் நான் கிடைக்கமாட்டேனாங்குற ஏக்கமும் எக்கச்சக்கமா இருந்துச்சு.. அதைப் பார்த்ததும் எனக்குள்ள ஒரு நம்பிக்கை.. அப்போ தான் எனக்கும் உன்மேல ஏதோ ஒரு உணர்வு இருக்குனு நான் ரொம்ப நாளா யோசிச்சது காதல்னு புரிய வந்துச்சு.. அப்புறம் ஒரு முடிவோட தான் டாக்டரை மீட் பண்ணி உண்மையை தெரிஞ்சு அம்மாவை வீட்டுல டிஸ்சார்ஜ் பண்ணிட்டு நேத்து நைட்டே உங்க அப்பாகிட்ட பர்மிஷன் கேட்க போனேன்.
அப்போ நீ வீட்டுல இல்ல.. இனியாவைப் பார்க்க அறிவு வீட்டுக்கு போயிருக்குறதா மாமா சொன்னாங்க.. உன் அப்பாவும் குளிச்சுட்டு இருந்தாரு.. எதேர்சையா உன் ரூமுக்கு போனேன்.. ‘அவனதிகாரம்’னு பெயர் போட்டு ஒரு டைரி இருந்துச்சு.. திருப்பி பார்த்தேன் இளான்னு என் பேரு போட்ருந்துச்சு.. அப்போ படிக்க முடியாதேன்னு ஆட்டையப் போட்டேன். அப்புறம் உன் அப்பாகிட்ட எல்லாம் பேசி புரியவச்சு சம்மதம் வாங்கி வீட்டுக்கு வந்த முதல் வேலையா அந்த டைரியை தான் படிக்க ஆரம்பிச்சேன்..
நாம சந்திச்சதுல இருந்து இப்போவர என்னைப்பத்தி உனக்கு தோணுன எல்லா விஷயத்தையும் எழுதியிருந்த.. படிக்க படிக்க அப்படி ஒரு கர்வம் எனக்குள்ள. ஏன்னா காதலிக்குறத விட காதலிக்கப்படுறது தான் இந்த உலகத்துலயே பெரிய சுகம்னு எனக்கு புரிஞ்சுது.. உன்னோட காதலைப் பத்தி தெரிஞ்சுக்கிட்ட அப்புறம் தான் எனக்கு இன்னொரு பொண்ணுமேல இருந்த உணர்வு சுத்தமா காதல் இல்லன்னு ஆணித்தரமான புரிஞ்சுது.. ” என்று கூறவும் அடுத்து அதிர்ந்தாள் விழி.
“வேற யாரையும் காதலிச்சீங்களா நீங்க” என்று கலங்கியபடி கேட்க அவள் கண்களை அழுந்த துடைத்தவன்,
“ஆமா விழி.. உன்கிட்ட நான் இந்த விஷயத்தை மறைக்க விரும்பல.. அந்த பொண்ணு வேற யாருமில்லை.. நம்ம இனியா தான்” என்று கூறவும் கண்ணீர் சிதறி விழுந்தது விழியின் விழியில் இருந்து.
“நான் இனியாவை லவ் பண்றதா நெனச்சுட்டு இருந்தேன் ஃபர்ஸ்ட் இயர்ல கொஞ்ச டேஸ்.. ஆனா அது காதல் இல்லன்னு மது தான் எனக்கு புரியவச்சா.. ஆனாலும் அதைக் காதல்னு முட்டாள்தனமா நெனச்சுட்டு இருந்தேன்.. அப்புறம் அறிவு இனியா ரெண்டு பெரும் லவ் பண்றங்கன்னு தெரிஞ்சதும் நான் கொஞ்சம் கொஞ்சமா அந்த எண்ணத்துல இருந்து வெளிய வந்துட்டேன்.. ஆனா ஆச்சர்யம் என்னனா ரொம்ப சீக்கிரமே வெளிய வந்துட்டேன்.. ஏன்னா அது தான் காதலே இல்லையே.. மதுவை தவிர்த்து என்கிட்டே நல்ல பேசுன பொண்ணு இனியான்னு அவ மேல ஏதோ ஒரு பீலிங்ஸ். அதை நான் ரொம்ப சீக்கிரமாவே உணர்ந்துட்டேன்..
ஆனா நீ.. உன்னோட ஒவ்வொரு செயலும் என்னை ரசிக்க வச்சது.. உனக்கொண்ணுனா என் மனசு பதறுச்சு.. உன்கிட்ட உரிமையா பேச தோணுச்சு.. அடிக்கடி உன் நியாபகம் எனக்கு வந்துச்சு.. இது தான் காதலோன்னு என் மனசு சொன்னாலும்.. அக்காவை லவ் பண்ணிட்டு தங்கச்சி மேல எப்படி லவ் வரும்னு என் மூளைக் கேள்விக் கேட்டதும் அதை நம்பி நான் பெருசா எடுத்துக்காம விட்டுட்டேன்.. அப்புறம் கொஞ்ச நாள்ல இது காதல் தான்னு எனக்கு உறுதியா தோணுச்சு.. ஆனா அப்போவும் என்னை நான் ஏமாத்திக்கிட்டேன்.. உன் அக்காவை லவ் பண்ணிட்டு இப்போ உங்கிட்ட என் காதல சொன்னேன்னு தெரிய வந்தா நீ என்னைத் தப்பா நெனைப்பியோன்னு அப்போவும் உன்கிட்ட சொல்லாம விட்டுட்டேன்..
ஆனா எப்போ உன் கண்ணுல எனக்கான கண்ணீரை நான் நேத்து பார்த்தேனோ அப்போவே முடிவு பண்ணிட்டேன்.. நீ தான் என் பொண்டாட்டின்னு.. இப்போ கூட நீ என் மனைவி உனக்கு எனக்கும் நடுவுல எந்த ஒளிவு மறைவும் இருக்க நான் விரும்பல.. அதனால் தான் சொன்னேன்.. இப்போ சொல்றேன் கேட்டுக்கோ.. நான் காதலிச்ச பொண்ணும் நீ தான்.. என்னைக் காதலிச்ச பொண்ணும் நீ தான்.. எல்லாம் தெரியுறதுக்கு முன்னாடியே உன்னைக் கல்யாணம் பண்ணனும்னு முடிவு பண்ணிட்டேன்.. ஆனா எல்லாம் தெரிஞ்சு தான் உன்னைக் கல்யாணம் பண்ணனும்னு விதியோ என்னவோ.. தெரியல எனக்கு.. இப்போ சொல்லு என்னை விட்டு போக நெனைப்பியா” என்று கேட்க அவளுக்கோ இப்பொழுது தான் மனது லேசாகியது.
இனியா பற்றி கூறும் பொழுது மனதில் வலி உண்டாகியது உண்மையென்றாலும் அதன் பிறகு அவன் கூறிய வார்த்தைகளில் அவனின் மனம் நன்றாகவே புரிந்தது அவளுக்கு. அவனோ அவளையே தவிப்பாய் பார்த்திருக்க அவளோ எதுவும் கூறாமல் செல்ல எத்தனிக்க அவனோ,
“ஹே பச்சமிளகா.. ஏதாச்சும் சொல்லிட்டு போ டி” என்க அவனைத் திரும்பி மட்டும் பார்த்தவள்,
“ஆட்டையைப் போட்ட டைரிய எப்போ கொடுப்பீங்க” என்று கேட்க அவனோ,
“நான் என்ன கேக்குறேன் இவ என்ன கேக்குறா” என்று வாய்விட்டே புலம்பியவன்,
“எம்மா தாயே.. நம்ம வீட்டுக்கு போனதும் முதல் வேலையா அந்த டைரியை ரிட்டர்ன் பண்ணிடுறேன் போதுமா.. போ.. போய் உன் அக்காக் கூட கும்மி அடி..” என்று கடுப்பாகக் கூறியவன் விறுவிறுவென்று சென்றுவிட்டான். செல்லும் அவனையே சிரிப்பாக பார்த்தவள் தன் தமக்கையோடு சென்று நின்றுக் கொண்டாள்.
வசீகரனின் அறையில் பெரியோர்கள் அனைவரும் பேசிக்கொண்டிருக்க இளையவர்களும் வந்து சேர்ந்தனர். கமலாவோ,
“என்ன பா.. மது கிட்ட பேசணும்னு சொன்னியே பேசிட்டியா.. உங்க பதிலுக்காக தான் நாங்க காத்துட்டு இருக்கோம்” என்க அவனோ,
“உங்க மருமகக்கிட்டயே கேளுங்க.. என்கிட்ட எதுக்கு கேட்குறீங்க” என்று முறுக்கிக்கொள்ள மதுவோ,
“ஐயோ டா ரொம்ப தான்” என்றவள்,
“எனக்கு சம்மதம்” என்றிட அனைவரும் அகமகிழ்ந்தனர். வசீகரனோ,
“இப்போ தான் எனக்கு முழுநிம்மதியா இருக்கு.. நேரத்தைக் கடத்தாம நேரடியா கல்யாணத்தை வச்சுக்கலாம்” என்றிட அனைவரும் சம்மதித்தனர். வரும் வார இறுதியிலே திருமணம் வைக்க தேதிகள் குறிக்கப்பட்டன. பத்திரிக்கையும் இரண்டே நாட்களில் அடித்தாயிற்று. மிக நெருங்கிய வட்டங்களுக்கு மட்டுமே அழைப்பு என்று முடிவு செய்யப்பட்டது.
ரகசியம் – 83
மறுநாள் மதுரன் உதய்குமாருக்கு அழைப்பு விடுத்தான். அழைப்பை ஏற்றவனோ,
“என்ன பாஸ்.. ஃபாரீன் எங்கயும் போயிட்டிங்களா.. ரெண்டு நாளைக்கு யாரும் உங்கள காண்டக்ட் பண்ண வேணாம்னு சொல்லிட்டீங்க.. இஸ் எவ்ரிதிங் ஆல்ரைட்..?”
“எவ்ரிதிங் இஸ் பெர்பெக்ட்ல்லி ஆல்ரைட் உதய்” என்றவனின் குரலில் மகிழ்ச்சி ததும்ப அதனைக் கண்டுகொண்டவன்,
“என்ன பாஸ்.. ரொம்ப குஷியா இருக்கீங்க.. நாளைக்கு உங்க மூவி ரிலீஸ் ஆக போறதுனாலயா” என்று கேட்க அவனோ,
“மூவியோட சேர்ந்து நாளைக்கு ஒரு இம்பார்ட்டண்ட் விஷயமும் ரிலீஸ் ஆக போகுது” என்றிட அவன் கூற்றில் குழம்பிய உதயோ,
“என்ன பாஸ் சொல்றீங்க.. அப்படி என்ன விஷயம்..”
“வெயிட் அண்ட் வாட்ச் மை பாய்.. நாளைக்கு ப்ரெஸ் மீடியா மீட்டிங் அரேஞ்ச் பண்ணிடு”
“அதுக்கு அவசியமேயில்ல பாஸ்.. எப்படியும் மூவி ரிலீஸ்க்காக உங்க கிட்ட பேட்டி எடுக்க வருவாங்க.. இல்லனா ஏதாவது சேனலுக்கு இன்டெர்வியு கூப்பிடுவாங்க.. ஆனா..” என்று உதய் இழுக்க,
“என்ன உதய்.. இழுக்குற.. வாட்ஸ் தி மேட்டர்”
“இல்ல பாஸ் அது வந்து.. இன்டர்வியூல மதுரிகா மேடமும் கூட இருப்பாங்க.. அவங்க முன்னாடி அந்த முக்கியமான விஷயம் நீங்க சொல்ல சம்மதிச்சா ஓகே தான்” என்று தயக்கமாக கேட்க மதுரனோ,
“ஓ அப்படி சொல்றியா.. சரி பார்த்துக்கலாம் விடு.. மார்னிங் ஆபீஸ்ல வந்து என்னைப் பிக்கப் பண்ணிக்கோ” என்றவன் அழைப்பைத் துண்டிக்க எத்தனிக்க உதயோ,
“பாஸ் பாஸ்.. ஒரு நிமிஷம்..”
“சொல்லு உதய்”
“இல்ல பாஸ்.. ஒரு குட் நியூஸ்.. என் ஆளு திரும்ப என்கிட்டயே வந்துட்டா” என்று வெட்கப்பட்டு கூற,
“ஹே ரியலி.. தட்ஸ் சூப்பர்ப்.. எப்படி”
“வலுக்கட்டாயமா மனசை மாத்த ட்ரை பண்ணி தான் அந்த கல்யாணத்துக்கு அவ சம்மதிச்சா.. ஒரு கட்டத்துல மனசு கேட்காம முகுர்த்தத்துக்கு முன்னாடியே அந்த பையன் விஷயத்தை சொல்லி அவனை வச்சே கல்யாணத்தை நிப்பாட்ட வச்சுட்டா.. அந்த பையன் தான் கல்யாணத்த நிப்பாட்டுனான்னு நெனச்சு அவ அப்பா அம்மா எங்க லவ்வுக்கு ஓகே சொல்லிட்டாங்க”
“பார்றா.. காங்கிரட்ஸ் உதய்”
“தேங்க்ஸ் பாஸ்..”
“ஓகே உதய்.. ரியலி ஹேப்பி ஃபார் யூ.. சி யு டுமாரோ” என்றவன் அழைப்பைத் துண்டித்தான்.
மறுநாள் விடிந்தது. மதுரன் உதயகுமாருடன் பிரபல தனியார் சேனல் ஒன்றின் நேர்காணலுக்காக வந்திருந்தான். அவன் வந்த சிறிது நேரத்தில் மதுரிகாவும் வந்திருந்தாள். பார்வையாளராக இளமாறன்-இமைவிழி மற்றும் அறிவமுதன்-அன்பினியா இரு ஜோடிகளும் வந்திருந்தனர். வீட்டில் சத்யன்-விஜயா மற்றும் வசீகரன் – கமலா இரு தம்பதியரும் தொலைக்காட்சியில் நேரடி ஒளிபரப்பைக் காண தயாராக இருந்தனர்.
நிகழ்ச்சி இனிதே ஆரம்பமாக படத்தைக் குறித்த கேள்விகள் இருவரிடமும் கேட்கப்பட்டது. இருவருமே நேர்த்தியாக பதிலளித்தனர். இருபாலர் ரசிகர்கள் இருவரின் நடிப்பையும் அவர்களுக்குள் இருக்கும் ஜோடி பொருத்தத்தையும் வெகுவாக ரசித்து பாராட்டினர். அதுவும் மதுரனது காட்சிகள் குறைவாக இருந்த போதிலும் தனது நடிப்பு திறமையை மிக அழகாக வெளிக்கொணர்ந்திருந்தான். வசீகரனுக்கு தனது மகனை ஒரு சிறந்த நடிகராக பார்ப்பதில் மட்டற்ற மகிழ்ச்சி.
படங்கள் குறித்த கேள்விகள் அனைத்தும் கேட்கப்பட்டு முடிந்தது. தொகுப்பாளினியோ,
“உங்க கிட்ட இருந்து எதாச்சும் சுவாரசியமான தகவல் வராதான்னு உங்க ரசிகர்கள் எல்லாம் ஆவலோடு காத்திருக்காங்க.. அவங்களுக்கு நீங்க என்ன சொல்ல விரும்புறீங்க” என்று இருவரிடமும் கேட்க இருவரும் ஒருவருக்கொருவர் பார்த்துக்கொண்டனர்.
“கண்டிப்பா உங்க எல்லார்கிட்டயும் ஒரு முக்கியமான தகவலை சொல்ல தான் ஆவலோடு காத்திருக்கேன்..” என்று மதுரன் கூறவும் அங்கே பலத்த கரகோஷம் எழுப்பப்பட்டது. அவனோ,
“ஆனா அந்த விஷயத்தை உங்க ஹீரோயின் மதுரிகா சொல்லுவாங்க” என்று அவளைக் கோர்த்துவிட அவளோ ஒருகணம் அவனை முறைத்தாள். மைக்கைக் கையில் வாங்கியவள்,
“எங்க ஜோடி பொருத்தம் படத்துல மட்டுமில்லாம இனிமே நிஜ வாழ்க்கையிலயும் தொடரப் போகுது” என்று கூற ரசிகர்களிடம் ஆரவாரம் அதிகரித்தது. தொகுப்பாளினியோ,
“மேடம்.. சோ ஆர் யு போத் டிசைடட் டு மேரி..?” என்று ஆச்சர்யமாக கேட்க அவளும் ஆமென்றாள். உதய்க்கோ பேரதிர்ச்சி..
“என்ன.. பாஸ் மது மேடம் கூட சேர்ந்துட்டாங்களா.. இது எப்போ..” என்றபடி ஆவலோடு மகிழ்ச்சியாய் பார்த்திருந்தான்.
“நாங்க சீக்கிரமே கல்யாணம் பண்ணிக்குறதா இருக்கோம்” என மதுரன் அவன் சார்பில் ஒருமுறைக் கூற பிறகு நேர்காணலும் நிறைவடைய அனைவரும் வீட்டிற்கு கிளம்பினர். மதுரன் மட்டும் உதய்குமாருடன் தனது அலுவலகத்திற்கு புறப்பட்டான்.
“பாஸ்.. எப்படி பாஸ்.. எனக்கு ஒண்ணுமே புரியல.. ரெண்டு நாள் கேப்ல அப்படி என்ன நடந்துச்சு.. எனக்கு மண்டையே வெடிச்சுரும் போல.. டெல் மீ.. இந்தியா வான்ட்ஸ் டூ க்னோ” என்றபடி இல்லாத மைக்கை அவனிடம் நீட்ட அதில் புன்னகைத்த மதுரனோ,
“விட மாட்டியே நீ..” என்றவன் நடந்த அனைத்தையும் கூறினான். உதயோ அனைத்தையும் பிரமிப்பாக கேட்டான்.
“சூப்பர் பாஸ்.. நான் இதை எதிர்பார்க்கவே இல்ல.. எப்படியோ எல்லாமே நல்லபடியா முடிஞ்சுது.. ஆனா பாஸ் எனக்கொரு டௌப்ட்” என்று கேட்க மதுரனோ,
“என்ன உதய்”
“இல்ல மது மேடம் கூட இந்த படம் நடிக்க முதல்ல சம்மதிக்க மாட்டேன்னு சொன்னீங்க.. அப்புறம் ஓகேன்னு சொன்னீங்க.. ஆனா அதுக்கு ஒரு காரணம் இருக்குன்னு சொன்னிங்களே அது என்ன” என்று அதிமுக்கியமான கேள்வியைக் கேட்க மதுரனுக்கோ அப்பொழுது தான் அப்படி ஒன்று நினைத்ததே நியாபகம் வந்தது.
“அது ஒன்னுமில்லை உதய்.. என் அப்பாவும் பானு அம்மாவும் ஒண்ணா நடிக்கும் போது தான் எங்க அப்பாவும் பானு அம்மாவும் தப்பு செஞ்சதா நெனச்சுட்டு இருந்தாங்கல.. அதனால இப்போ நான் மது கூட நடிச்ச அப்புறம்.. மதுவும் என்கூட நடிச்சுருக்கா.. அதுக்காக நாங்க என்ன தப்பா செஞ்சோம்னு கேட்கலாம்னு முடிவு பண்ணி சரின்னு சொன்னேன்.. ஆனா அதுக்கு எல்லாம் அவசியமே இல்லாம என் மச்சான் மாறன் எல்லாத்தையும் கண்டுபிடிச்சுட்டான்..” என்க,
“ஓஹோ.. டெமோ காட்டி புரிய வைக்கலாம்னு யோசிச்சீங்களாக்கும்.. என்னவோ மாறன் சார் எல்லாத்தையும் சுமுகமா முடிச்சு வச்சுட்டாரு.. எனக்கென்னமோ இந்த ரைட்டரம்மா மாறன் சார ஹீரோ ஆக்கணும்னு முடிவு பண்ணியே எல்லாம் பண்ற மாதிரி இருக்கு..” என்க மதுரனோ அவனை முறைக்க,
“ஹிஹி.. சும்மா ஜோக்கு ஜோக்கு… அவ்வ்” என்று புலம்பிக்கொண்டான்.
அவ்வாறே அவ்வாரம் கழிய அவர்களது திருமண நாளும் வந்தது.
கோலாகலமாக திருமண மண்டபம் அலங்காரத்தில் ஜொலித்து கொண்டிருந்தது. ஆனால் அவ்வலங்காரங்களை விட மணமக்கள் முகத்தில் தான் எத்தனை ஜொலிப்பு.. நினைத்தவரை மணமுடிக்கும் பாக்கியம் அனைவருக்கும் அமைந்துவிடாது தானே..
எத்தனை போராட்டங்கள்.. எத்தனை சண்டை சச்சரவுகள்.. எத்தனை அழுகைகள்.. எத்தனை ஏக்கங்கள்.. அனைத்தையும் முறியடித்து இன்று காதலர்கள் ஒன்றாக சேரும் சமயமிது.
ஆனால் இத்தனைக்கும் காரணமானவனோ மணமகன் அறைக்குள் நின்று கொண்டு எதிரில் மணமகள் அறைக்குள் நிற்கும் தன் மனைவியைத் திருட்டுத்தனமாக சைட் அடித்துக் கொண்டிருந்தான். அவனின் கூர் பார்வை அவளின் இதயத்தைத் துளைத்ததோ என்னவோ.. சட்டென அவள் திரும்பி பார்க்க இவனோ இங்கிருந்தே பறக்கும் முத்தத்தை ஏவிவிட்டான்.. ஆனால் அதற்கெல்லாம் அசருபவளா நம் விழி.
கோபங்கள் அன்றைக்கே தீர்ந்திருந்தாலும் இத்தனை வருடங்களாக தன்னைக் காக்க வைத்தவனுக்கு தண்டனை வழங்க எண்ணி ஒரு வாரமாக அவனை அலையவிட்டு கொண்டிருக்கிறாள். அவள் வேண்டுமென்று செய்கிறாள் என்று தெரிந்தும் அவளின் கள்வன் அலைந்து கொண்டிருந்தான் அவள் பின்னே.. தெரிந்தும் தோற்பது தானே காதலில் சுகம்..
இவ்வாறாக மணமகனை இளமாறனும் அறிவமுதனும் ஒருவழியாக தயராக்க அங்கு மணமகளை இமைவிழியும் அன்பினியாவும் தயாரிக்கிக் கொண்டிருந்தனர்.
வெளியே வசீகரன் ஓரிடத்தில் சில மருத்துவ சாதனங்களோடு மகனின் திருமணம் காணும் ஆவலில் அமர்ந்திருக்க மற்ற பெரியோர்கள் அனைவரும் அவர்களது வேலைகளை மும்முரமாக செய்து கொண்டிருந்தனர். சிறிது நேரத்தில் ஐயர் மாப்பிள்ளையை அழைத்து வர சொல்ல மாறனும் அறிவும் மதுவின் சகோதரன் என்ற முறையில் மதுரனை அழைத்து வந்து மேடையில் அமரவைத்து அவன் கழுத்தில் மாலை அணிவித்தனர். மதுரனோ மந்திரங்களை ஓதுகிறேன் என்ற பேர்வழி மணமகள் அறையையே நோட்டம் விட அதில் கடுப்பான ஐயரோ,
“ரொமென்டிக் ஸ்டார் நீங்க தான்.. அதுக்காக ஹோமம் முன்னாடி உக்காந்துட்டு ரொமான்ஸ் பண்ண நினைக்கக்கூடாது அம்பி..” என்க மதுரன் அசடு வழிய மாறனும் அறிவும்,
“இது தேவையா கோபி” என்றபடி சிரித்துக் கொண்டிருந்தனர். பிறகு ஒருவழியாக,
“பொண்ண அழைச்சிட்டு வாங்கோ” என்று கூறியதும் விழியும் இனியாவும் மதுரனின் தங்கை முறையாக மதுரிகாவை அழைத்து வந்து மேடையில் அமர்த்தி மாலை அணிவித்தனர்.
சுற்றி அனைவரும் இருப்பதையே மறந்து மணமக்கள் ஒருவரையொருவர் கண்களாலேயே தங்கள் காதலைக் கடத்த மேலும் கடுப்பான ஐயரோ,
“மதுரன் மதுரிகா.. உங்க பெயர் பொருத்தமே பேஷ் பேஷ்.. ஆனா இந்த லவ்ஸ உங்க படத்துலயும் ரூம்லயும் வச்சுகோங்கோ.. இப்போ மந்திரத்தை சொல்லுங்கோ..” என்றிட சுற்றி சிரிப்பலைகள் எழுந்தன. பிறகு தாலியை அனைவரிடமும் ஆசிர்வாதம் வாங்க இனியா சென்றிட விழியின் மனதில் ஒரு சிறு ஏக்கம் இருந்தது. தனக்கு திருமணம் பிடித்தவருடன் நடந்தாலும் இந்த பொக்கிஷ தருணங்கள் கிட்டவில்லையே என. தாலி ஆசிர்வாதம் வாங்கப்பட்டு வந்ததும் ஐயர்,
“கெட்டிமேளம் கெட்டிமேளம்” என்றிட அனைவரது ஆசிர்வதத்துடன் மதுரன் மதுரிகாவின் நெற்றியில் தன் இதழ் பதித்து,
“லவ் யூ சோ மச் தூரிகா” என்க கண்கலங்கியவள்,
“லவ் யூ தூரா” என்றவள் பதிலுக்கு அவன் நெற்றியில் தன் இதழ் பதிக்க அதனை நெகிழ்வுடன் பெற்றுக்கொண்டவன் தன்னவளின் சங்கு கழுத்தில் மங்கள நாணைப் பூட்டினான். அனைவரது மனமும் நிரம்ப மனமார வாழ்த்தினர்.
பிறகு மணமக்கள் மணமேடையில் இருந்து எழும்ப பெற்றவர்களிடம் ஆசிர்வாதம் வாங்க தான் எழுந்திருக்கிறார்கள் என்று நினைத்திருக்க மதுரன் மாறனையும் மதுரிகா விழியையும் அழைத்து வந்து மணமேடையில் அமரவைத்தனர்.
இருவரும் புரியாமல் முழிக்க மதுரன் இனியாவிடம் கண்ணசைக்க அவள் அறையில் வைத்திருந்த மற்றொரு மாங்கல்யத்தை எடுத்து வந்து அனைவரிடமும் ஆசிர்வாதம் வாங்க சென்றாள். விழி கண்கள் கலங்கி பார்க்க மாறனோ,
“என்ன மச்சான் இது” என்று கேட்க மதுரனோ,
“உன் தங்கச்சி ஐடியா தான் டா இது.. அவகிட்ட கேட்டுக்கோ” என்றிட இருவரும் மதுவை நோக்க,
“டேய் மாறா.. கல்யாணமுங்குறது நம்ம வாழ்நாள் பொக்கிஷம்.. அந்த தருணம் எல்லாம் நினைக்க நினைக்க நமக்கு தித்திப்பா இருக்கும்.. ஆனா உனக்கும் சரி விழிக்கும் சரி அது ஒரு ஆக்சிடெண்ட்டா நடந்து முடிஞ்சுட்டு.. உனக்கு பெருசா ஏதும் தோணாலனாலும் ஒரு பொண்ணா விழியோட மனசு இந்த விஷயத்துக்காக ஏங்கும்.. அதான் இந்த ஏற்பாடு..” என்க விழியோ நன்றியுணர்வோடு கண்கள் கலங்க பார்த்தாள் மதுவை. ஐயரோ,
“என்ன இது.. ஒரு கல்யாணத்துக்கு பேமண்ட் பண்ணிட்டு ரெண்டு கல்யாணத்தை நடத்த சொல்றேள்.. ” என்க அறிவோ,
“டபுள் பேமண்ட்டா வாங்கிகோங்கோ ஐயரே..”
“அப்போ சரி பேஷா பண்ணிடலாம்.. மாங்கல்யம் தந்துனானே” என மந்திரத்தை உச்சரிக்க தொடங்கினார். பிறகு மீண்டும் கெட்டிமெளம் ஒலிக்கப்பட இளமாறன் காதலாய் தன் மனைவியை நோக்கி,
“லவ் யூ பச்சமிளகா..” என்றபடி தங்க செயினோடு தாலியை அணிவிக்க மனம் நிறைந்த மகிழ்வோடு அதனைப் பெற்றுக்கொண்டாள் அவனின் இமை.
ஐயரோடு சேர்ந்து அனைவரது மனதிலும் டபுள் தமாகா மகிழ்ச்சி நிறைந்து காணப்பட்டது. மாறனோ தன்னவளிடம்,
“இப்போ ஹேப்பியா பொண்டாட்டி” என்று கேட்க அவளோ,
“அதெல்லாம் இருக்கட்டும். வீட்டுக்கு வந்ததும் என் டைரியை தரேன்னு சொன்னீங்க.. எங்க” என்று கேட்க மாறனுக்கு எங்கு போய் முட்டிக்கொள்ளலாம் என்று இருந்தது.
ஏனென்றால் நிஜமாகவே அந்த டைரி இப்பொழுது அவனிடம் இல்லை. அன்று படித்தபிறகு தன் அறையின் மேஜையில் தான் வைத்திருந்தான். ஆனால் பாண்டிச்சேரி சென்றுவிட்டு வந்ததும் அதனை விழியிடம் கொடுக்க எண்ணி அவன் தேட அதுவோ காணவில்லை. இது தெரிந்தால் அவள் என்ன ஆட்டம் ஆடுவாளோ என்ற பீதி வேறு எழுந்தது. பிறகு இரு ஜோடிகளும் பெரியவர்களின் காலில் விழுந்து ஆசிபெற்றனர்.
அப்பொழுது அறிவமுதன் ஒரு பெரிய பார்சலை எடுத்து வந்து மதுரன் மற்றும் மதுரிகாவிடம் கொடுக்க இருவரும் புரியாமல் பார்க்க,
“பிரிச்சு பாருங்க..” என்க இருவரும் பிரித்து பார்க்க இருவரது முகங்களும் பிரகாசமாய் ஒளிர்ந்தது. அதனைக் கண்டு ஆச்சர்யப்பட மதுரனோ,
“டேய் இது எப்போ டா எடுத்தீங்க.. ” எனவும் மதுவோ,
“அடப்பாவி.. எங்களுக்கே தெரியாம எடுத்துருக்க.. செமையா இருக்கு” என்க மாறனோ அறிவிடம்,
“சகல… இது அது தானே” என்று கேட்க அறிவோ,
“அதே தான் சகல.. இப்போ புரிஞ்சுதா அன்னைக்கு நான் ஏன் இதை எடுத்தேன்னு” என்று கேட்க இனியாவோ,
“என் அமுதுக்குள்ள இப்படி ஒரு அறிவா..” என வியக்க விழியோ,
“அதான் என் மாம்ஸ்க்கு அறிவமுதன்னு பேரு வச்சுருக்காங்க.. என்ன மாம்ஸ்” என்று கேட்க அவனோ,
“என் கொழுந்தியா சொன்னா கரெக்ட்டா தான் இருக்கும்” என்க இனியாவிடம் இருந்து இலவச கொட்டுகளை பெற்றுக்கொண்டான்.
அறிவு மதுரன் மதுரிகாவிடம் கொடுத்தது ஒரு புகைப்படம். அதுவும் சாதாரண புகைப்படம் அல்ல.. காதல், வலி, பிரிவின் ஏக்கம் என அனைத்து உணர்வுகளையும் பிரதிபலிக்கும் உன்னதமான புகைப்படம். ஆம். அன்று விமானநிலையத்தில் ஒருவரையொருவர் பிரிய மனமின்றி மதுரன் மதுரிக்கவின் கன்னம் தாங்கியபடி கண்களில் காதலைத் தேக்கி பார்க்கும் அழாகன சித்திரம். எப்பொழுதாவது அவர்களுக்கு அனுப்பலாம் என்று நினைத்து தான் எடுத்தான். ஆனால் இப்பொழுது திருமணத்தின் போது கொடுப்பதற்கு இதைவிட சிறந்த பரிசு இருக்காது என்று தோன்ற அதையே கொடுத்துவிட்டான்.
ஒரு ஜோடிக்கு பரிசு கொடுத்து மறுஜோடிக்கு கொடுக்காமல் இருக்க முடியுமா.. இனியாவோ ஒரு பத்திரத்தோடு வந்து அதனை மாறன் மற்றும் விழியிடம் கொடுக்க அவர்களும் புரியாமல் முழிக்க பிறகு பிரித்துப் பார்த்தனர்.
அது பிரபல தயாரிப்பு நிறுவனம் ஒன்று விழியின் கதையைப் படமாக்க சம்மதித்து கதையில் முடிவு மட்டும் முடிக்கப்படாமல் இருப்பதாகவும் முடித்ததும் படப்பிடிப்பை வைத்துக்கொள்ளலாம் என்றும் அதற்கு இளமாறன் மற்றும் இமைவிழியே கதாநாயகன் கதாநாயகி என்றும் குறிப்பிட்டு கையெழுத்திட்டு முன்பணமாக ஒரு காசோலையையும் இணைத்திருக்கும் பத்திரம். அதனைப் படித்த விழியோ இனியாவிடம்,
“ஹே இனியா.. நான் ரீசண்ட்டா எந்த ஸ்டோரியும் எழுதலையே டி” என்க அவளோ,
“எழுதிருக்க.. கதைக்கு பேர் கூட வச்சிருக்க..” என்று கூற மாறனோ,
“என்ன இனியா சொல்ற.. ஆமா இதுல எதுக்கு நாங்க நடிக்குறதா போட்டுருக்காங்க.. அதுவும் இவ்ளோ பெரிய புரொடக்ஷன் கம்பெனி எப்படி எங்களை…” என்று கேள்வி கேட்க இனியாவோ,
“பின்ன இந்த கதைல உங்களைத் தவிர வேற யரலையும் அவ்ளோ கச்சிதமா நடிக்க முடியாது.. அதனால தான்.. ” என்க இருவரும் மேலும் குழம்ப அறிவோ,
“அன்பு.. எதுக்கு அவங்கள இவ்ளோ குழப்புற” என்றவன் விழியின் அவனதிகாரம் என்ற டைரியை எடுத்து கொடுத்தவன்,
“படத்தோட டைட்டில் அவனதிகாரம்..” என்றிட விழி மற்றும் மாறனுக்கு இன்ப அதிர்ச்சி. இருவரும் இதனை சற்றும் எதிர்பார்க்கவில்லை. விழியோ கண்கள் கலங்கி பார்க்க இனியாவோ,
“மதுரனோட ரெக்கமண்டேஷன்ல தான் அந்த புரொடக்ஷன் கம்பெனி முதல்ல கதையை வாசிக்க சம்மதிச்சாங்க.. ஆனா கதையைப் படிச்ச அப்புறம் உன்னோட எழுத்துல கவரப்பட்டு கண்டிப்பா இதைப் படமா எடுத்தே ஆகணும்னு முடிவு பண்ணி சைன் பண்ணி கொடுத்துட்டாங்க.. சீக்கிரம் கதைக்கு எண்ட்கார்டு போடு டி..” என்க மகிழ்ச்சியாய் தனது டைரியை வாங்கியவள் இடையில் நடந்தவற்றை எழுதுவதற்கு சில பக்கங்களை மட்டும் விடுத்து கடைசியில்,
“தனித்துருகிய காதல் இதயம்
கடைசியில் காதலித்த இதயத்தின்
கரம்பற்றி காதலில் திளைத்தது.. முற்றும்..” என்று எழுத அனைவருக்கும் மனம் நிறைந்த மகிழ்ச்சி.
அப்பொழுது மதுவோ மதுரனுடன் மாறன் முன் வந்து நிற்க அவனோ கேள்வியாய் அவர்களை நோக்க இருவரும் சட்டென அவனின் காலில் விழுந்தனர். இதனை எதிர்பார்க்கதவன் பதற,
“ஹே என்ன பண்றீங்க ரெண்டு பேரும்.. எந்திரிங்க” என்க மதுவோ,
“டேய் மாறா.. நீ என்கூட இருக்குறதுக்கு நான் எந்த ஜென்மத்துல புண்ணியம் பண்ணேன்னு தெரியலடா.. நீ மட்டுமில்லனா நம்ம வாழ்க்கை எல்லாம் என்ன ஆகிருக்கும்னு நினைக்கவே பயமா இருக்கு… நான் தூரன் மேல வைக்காத நம்பிக்கையை நீ அவன் மேல வச்சு ஒரு வருஷமா உண்மையைக் கண்டுபிடிக்க போராடிருக்க.. உன்னோட ஆசிர்வாதம் தான் டா எங்களுக்கு முதல்ல வேணும்” என்க இருவரையும் வல்லுகட்டயமாக எழுப்பியவன்,
“ஹே பிசாசு.. என்ன டி இது புது பழக்கம்.. நீ என் மது டி.. எனக்காக நீ எவ்ளோ விஷயம் சின்ன வயசுல இருந்து செஞ்சிருக்கன்னு எனக்கு மட்டும் தான் டி தெரியும்.. அப்போ உனக்கு நான் செய்யாம வேற யார் செய்வாங்க.. ” என்றவன் அவளைக் கண்ணியமாகவும் வாஞ்சையாகவும் அணைத்துக் கொண்டான்.
மதுமாறன் ஆகிய இவர்கள் காலமுழுக்க உன்னத நட்பில் ஒற்றுமையாக வாழவும்..
மதுரன் – மதுரிகா
இளமாறன் – இமைவிழி
அறிவமுதன் – அன்பினியா
இவ்வாறு பெயரில் மட்டுமல்லாது வாழ்க்கையிலும் இவர்கள் கச்சிதமாக பொருந்தி வாழவும்..
ரகசியமாய் தவித்த நிகழ்வுகளெல்லாம்
ரகசியங்களாகவே தவிர்க்கப்பட்டு
அதிசயங்கள் மட்டுமே இனி வாழ்வில் நிகழவும்..
இருதயமே துடிக்கிறதா
துடிப்பது போல் நடிக்கிறதா
உரைத்திடவா மறைத்திடவா
ரகசியமாய் தவித்திடவா
ஒரு பெண்ணின் நினைவென்ன செய்யும்
எனை கத்தி இல்லாமல் கொய்யும்
இதில் மீள வழி உள்ளதே
இருப்பினும் உள்ளம் விரும்பாது ஓ யே
எனும் வரிகளுக்கேற்ப காதலர்கள் மூவரும் தத்தம் காதலிகளின் நினைவிலும் நிஜத்திலும் நித்தமும் மூழ்கவும் மனதார வாழ்த்துவோமாக..
–———————-
இன்னும் முடியல.. எபிலாக் இருக்கு..
மூன்று வருடங்களுக்கு பிறகு..
மாலை கதிரவன் நிலாமகளுக்கு உலகினை ஆள வரச்சொல்லி தூது அனுப்பிவிட்டு தன் பணி முடிந்த நிம்மதியில் மறைந்து கொண்டிருந்த நேரம் சென்னை மாநகரில் பிரபல தொலைக்காட்சி சேனல் அமைந்திருக்கும் இடத்தில் திரளான மக்கள் கூடியிருந்தனர். அதிலும் பெரும்பாலானோர் இளம் வயது பெண்கள் ஒருபுறம்.. மறுபுறம் இளம் வயது ஆண்கள்..
வாசலில் பல கோடி மதிப்புள்ள ஒரு மகிழுந்து வந்து நிற்க கூட்டம் ஒதுங்கி மகிழுந்திலிருந்து இறங்கி வரவேண்டியவருக்கு வழிவிட்டது. ஆயினும் கூச்சல் நின்றபாடில்லை. இன்னும் அதிகரிக்க தான் செய்தது.
“லவ் யூ மது… நான் உங்க பெரிய ரசிகை” என்று பெண்கள் பலர் கூச்சலிட்டு கொண்டிருக்க அவர்களுக்கு நாங்கள் சளைத்தவர்கள் அல்ல என்னும் விதமாக,
“லவ் யூ மது.. எங்க கனவு கன்னியே நீங்க தான்” என்றபடி ஆண்கள் கூச்சலிட்டு கொண்டிருந்தனர். காரினுள் இருந்து இறங்கினார்கள் அவர்கள் இருவரும்.
நீல நிற கோட் ஷூட்டில் கூலிங் கிளாஸ் அணிந்து மன்மதன் போன்று.. அல்ல அல்ல மன்மதனே வந்து இறங்கியது போன்று இருந்தான் மதுரன். தனக்காக கூடியிருந்த கூட்டத்தை நோக்கியவன் ஸ்டைலாக தன் கூலிங் கிளாசினைக் கழட்டி தன்னை நேசிக்கும் கூட்டத்திற்கு ஹாய் என்று கைக்காட்ட பெண்களின் கூச்சல் அதிகரித்தது.
தன்னவனின் அழகினை தானும் ரசித்தவாறு அவனுக்கு இணையாக நீல நிற புடவை அணிந்து கண்களில் மிதப்புடனும் ரசிகர்களின் மீது மரியாதையுடனும் இறங்கினாள் மதுரிகா.
பலதரப்பட்ட மதிப்பு மரியாதையுடன் வரவேற்கப்பட்டவர்கள் அவர்களுக்காக பிரத்யேகமாக ஒதுக்கப்பட்ட இருப்பிடத்தில் அமர நிகழ்ச்சி இயக்குனர், “லைட்ஸ், கேமரா, ஆக்ஷன்” என்று கூறியவுடன் நிகழ்ச்சி தொகுப்பாளினியோ,
“ஹாய் ஹெலோ வணக்கம் இது உங்க சேனல் “*******” நாம எல்லாரும் ஆவலோட எதிர்பார்த்துட்டு இருந்த பிரபல நடிகர், பெண்களின் கனவு கண்ணன், வருங்கால ரொமென்டிக் ஸ்டார் மிஸ்டர் மதுரன் மற்றும் இளைஞர்களின் கனவு கன்னி அழகு பதுமை, படத்தில மட்டுமில்லாம நிஜவாழ்க்கையிலயும் மதுரன் அவர்களைக் கரைப்பற்றிய மிச்செஸ் மதுரிகா.. இவன் ரெண்டு பேரோட நேர்காணல் தாங்க இது.. வாங்க நிகழ்ச்சிக்கு போகலாம்..” என தன் உரையை ஆரம்பித்தாள் அவள்.
“ஹலோ சார்.. ஹலோ மேம்.. எப்படி இருக்கீங்க”
“எல்லாருக்கும் வணக்கம்.. ஐம் குட்..” என கம்பீரக் குரலில் வசீகர புன்னகையுடன் அவன் கூற அரங்கமே பெண்கள் கூச்சலால் ஆர்ப்பரித்தது.
“வணக்கம்.. நான் ரொம்ப நல்லாயிருக்கேன்..” என்று பவ்யமாய் மதுரிகா கூற அவளை ரசிகர்கள் கூச்சலிட்டனர்
“ஓ மை காட்.. உங்க ரெண்டு பேரோட ரசிகர்கள் பட்டாளம் இந்த ஸ்டேஜயே அதிர வைக்குது. சரி நான் கேள்விகளை ஆரம்பிக்கலாமா” என தொகுப்பாளினி கேட்க, அவனும் “ஷுயர்” என தலையசைக்க அவளும் தலையசைத்தாள். இப்பொழுது கூச்சல் அடங்கி அவர்கள் கூற போகும் பதிலுக்காக அமைதி காத்தனர் அவர்களது ரசிகர்கள்.
“சொல்லுங்க மிஸ்டர் மதுரன்.. உங்க முதல் ரெண்டு படத்துலயே நீங்க அட்டகாசமா நடிச்சுருந்தீங்க.. அந்த குஷில இருந்தே உங்க ரசிகர்கள் வெளிய வராத பட்சத்துல அடுத்த ஆறு மாசத்துலயே உங்களோட மூன்றாவது படம் ரிலீஸ் ஆகி அதுவும் அபாரமான வெற்றி அடைஞ்சது.. அந்த வெற்றிய தொடர்ந்து இப்போ உங்க ஐந்தாவது படம் வெற்றிகரமா ஓட்டிட்டு இருக்கு இந்த வெற்றிக்கெல்லாம் காரணமென்னன்னு நெனைக்குறீங்க”
“என்னோட படம் வெற்றியடைய காரணம் என்னோட ரசிகர்கள்.. அவங்களுக்கு தான் நன்றி சொல்லணும்.. ஆனா படத்துல நான் வெற்றியடைய காரணம் ஒருத்தங்க தான்” என்றவன் தன்னவளை தன் கண்களில் காதல் மின்ன பார்த்தான்.
“ஓஒ.. மேடம் கண்டிப்பா நீங்க தான் சாருக்கு பக்கபலமா இருந்துருப்பீங்க.. அதுமட்டுமில்ல உங்க ரெண்டு பேரோட கெமிஸ்ட்ரி படத்துல மட்டுமில்ல நேருல கூட ரொம்ப அழகா இருக்கு.. நீங்க என்ன சொல்ல விரும்புறீங்க” என்றவள் மைக்கை மதுரிகாவிடம் நீட்ட,
“அவங்க வெற்றிக்கு காரணம் நான்னு சொல்றாங்க.. ஆனா உண்மைய சொல்லப்போனா.. அந்த வார்த்தையை நான் தான் சொல்லணும்… என்னோட வெற்றிக்கு முழு காரணம் அவர் மட்டும் தான்..” என்று அவள் கூற தொகுப்பாளினியோ,
“இப்படி நீங்க ஒருத்தர் ஒருத்தர் மாத்தி மாத்தி சொல்லிக்கும்போதே உங்க ரெண்டு பேரோட வாழ்க்கை வெற்றி அடைஞ்சுருச்சுன்னு எங்களுக்கு நல்லாவே தெரியுது.. ” என்க அரங்கம் முழுவது கரகோஷம் எழும்பியது.
“ஓகே சார்.. இந்த ஐந்தாவது படம் உங்க வாழ்க்கைக்கு ரொம்ப நெருக்கமான படம்னு நீங்க சொல்லிருந்தீங்க.. அதுமட்டுமில்லாம இந்த படம் முன்னாள் நடிகர் வசீகரன் மற்றும் முன்னாள் நடிகை பானு அவர்களின் வாழ்க்கை வரலாறா இருக்கும்னு மக்கள் கணிச்சுருக்காங்க.. இதைப் பத்தி உங்க கிட்ட கேட்ருந்தப்போ இது பத்தி தனியா பேசுவோம்னு சொல்லி தான் இப்போ இந்த மீட்டிங் அரேஞ்ச் பண்ணிருக்கோம்.. சோ ப்ளீஸ் ப்ரொசீட் சார்..” என்று கூற அவனோ,
“சொல்றேன்.. ஆனா மக்களுக்கு இதுல என்னென்ன கேள்விகள் இருக்குன்னு எனக்கு தெரியணும்.. கேக்குறவங்க கேட்கலாம்.. நான் மொத்தமா பதில் சொல்லிடுவேன்” என்று கேட்க கூட்டத்தில் ஒருவர்,
“வணக்கம் சார்.. எனக்கு ஒரு சந்தேகம்.. முன்னாள் நடிகர் வசீகரனோட வாழ்க்கைப்படம் தான் இதுன்னு தெள்ளத் தெளிவா தெரியுது.. அவரைப் பத்தின விஷயம் எல்லாருக்கும் தெரியும்.. ஆனா நீங்க போயும் போயும் அவரோட வாழ்க்கையை எதுக்கு எடுக்கணும்.. சாதிச்ச நெறய பேர் இருக்காங்க.. ஏன் அவரு.. அதுவு அவர் செஞ்ச தப்பெல்லாம் நியாய படுத்தின மாதிரி எதுக்கு நடிக்கணும்” என்று கேட்க அவரின் கேள்விகளுக்கு புன்னகையை மட்டும் பதிலாக அளித்தவன்,
“நெக்ஸ்ட்” என்றான். இவ்வாறு சிலர் கேள்விகள் கேட்டு முடிக்க எழுந்தவன் பேச ஆரம்பித்தான்.
“உங்க எல்லாரோட கேள்விகளுக்கும் என்கிட்ட பதில் இருக்கு.. ஆமா நீங்கி எல்லாரும் நெனச்ச மாதிரி இது முன்னாள் நடிகர் வசீகரனோட வாழ்க்கை படம் தான்.. நான் இதை நடிக்க காரணம் என்னன்னா அவர் மேல எழுந்த கலங்கத்தைப் போக்க வேண்டியது என் கடமை.. நடந்த உண்மையைத் தெரிவிக்க வேண்டியதும் என் கடமை” என்று கூற கூட்டத்தில் சலலப்பு ஏற்பட.. தொகுப்பாளினியோ,
“உங்க கடமையா.. ஏன்னு நாங்க தெரிஞ்சுக்கலாமா” என்க அவனோ,
“ஏன்னா.. அவர் என்னோட அப்பா..” என்க அனைவரது முகத்திலும் அப்பட்டமான அதிர்ச்சி.
“ஆமா.. முன்னாள் நடிகர் வசீகரன் மற்றும் அவரோட மனைவி கமலாவோட பையன் நான் தான்.. நீங்க நெனைக்குற மாதிரி வசீகரன் எந்த தப்பும் செய்யல.. இந்த படத்துல வரது தான் நிஜம் .. ” என்றவன் அதற்கான ஆதாரங்களைக் காண்பித்தான்.
ஆம் மதுரன் வசீகரனாகவும் மதுரிகா பானுவாகவும் நடித்த படம் தான் இப்பொழுது ஓடிக்கொண்டிருக்கிறது. மதுரன் மதுரிகா திருமணம் முடிந்த சிலநாட்களில் மனதிலுள்ள பாரங்கள் அனைத்தும் வடிந்த நிம்மதியில் வசீகரன் உறக்கத்திலேயே இயற்கை எய்தினார். தன் தந்தையின் மீதுள்ள கலங்கத்தைத் துடைத்த பின்பே அவருக்கு திதி கொடுப்பேன் என்று சபதம் எடுத்தவன் அதற்கான பணிகளில் ஈடுபட்டு இன்று வெற்றியும் கண்டான்.
நடந்த அனைத்தையும் கேள்விப்பட்ட மக்களிடையே விவாதங்கள் நிறைய நடக்க ஆதாரங்கள் அனைத்தையும் வைத்து வசீகரன் மீது தவறில்லை என்று ஊர்ஜிதப்படுத்தப்பட்டது.
பிறகு நிகழ்ச்சி முடிந்து வீட்டிற்கு செல்ல கமலா, விஜயா, சத்யன், மாறன் மாற்று விழி என் அனைவரது மனத்திலும் நிறைவு. சத்யனோ,
“ஒருவழியா நீ சொன்னதை செஞ்சி காட்டிட்ட மதுரா.. உன்ன பையன பெத்ததுக்கு உன் அப்பா பெருமைப்படுவாரு கண்டிப்பா. நாளைக்கு உன் அப்பாவோட மூணாவது திதி.. நாளைக்கு திதி கொடுத்துறலாம் தான” என்று கேட்க விஜயாவோ,
“அவரோட சேர்ந்து பானுவுக்கும் நாம திதி கொடுக்கணும்.. இத்தனை வருஷமா அவ மேல உள்ள கோபத்துல நீங்க அவளுக்கு திதி கொடுக்க சம்மதிக்கவே இல்ல.. உண்மைத் தெரிஞ்ச அப்புறம் கூட நாம திதி கொடுக்குறத பத்தி யோசிக்கவே இல்ல.. இப்போ அண்ணனுக்கு திதி கொடுக்கணும்னு சொன்ன அப்புறம் தான் எனக்கு தோணுச்சு” என்க சத்யன் கமலாவைப் பார்த்தார்.
அவரும் தன் கணவனின் காதல் தான் நிறைவேறவில்லை. இருவரது ஆத்ம சாந்தியும் ஒன்றாக நிகழட்டும் என்று சம்மதம் தெரிவிக்க மாறனோ,
“அப்புறம் என்ன நாளைக்கு வசீ மாமாக்கும் பானு அத்தைக்கும் திதிக்கு ஏற்பாடு நான் பண்றேன்.. ராமேஸ்வரம் போய் திதி கொடுத்தா சிறப்பா இருக்கும்னு நினைக்குறேன்..” என்க அதுக்கான ஆயத்த பணிகள் ஆரம்பமானது.
பின் அறைக்கு சென்ற விழியின் அலைபேசி அலற அதனை ஏற்றவள் ஸ்பீக்கரில் போட்டு,
“ஹலோ” என்றாள்.
“மேடம்.. நாங்க ******* ப்ரொடக்ஷன் டீம்ல இருந்து பேசுறோம்.. நீங்களும் இளமாறன் சாரும் நடிச்ச “அவனதிகாரம்” படம் பாக்ஸ் ஆபிஸ் ஹிட் கொடுத்ததுக்கு நாளைக்கு பார்ட்டி இருக்கு..” என்று கூறிட மாறனோ,
‘அடக்கடவுளே.. நாளைக்கு தான திதி கொடுக்க போறோம்னு பிளான் போட்டோம்.. இப்போ விழி இதுக்கு என்ன சொல்லுவா.. அவளுக்கும் பார்ட்டி போகணும்னு ஆசை இருக்கும் தான..’ என்று மனதில் யோசிக்க அவளோ,
“இல்ல சார்.. நாளைக்கு என்னாலயும் அவராலயும் வர முடியாது.. வேற கமிட்மென்ட் இருக்கு சார்.. நீங்க என்ஜாய் பண்ணுங்க.. தேங்க்யூ” என்று கூறி வைத்துவிட தன் மனைவியை எண்ணி ஆடவன் பூரித்து போனான். அவளையே கண்கொட்டாமல் அவன் பார்க்க அவளோ,
“என்ன இளா.. அப்படி பார்க்கறீங்க” என்க அவனோ,
“லவ் யூ டி பச்சைமிளகா” என்றிட அவளோ,
“ஏன் இளா.. நான் பார்ட்டிக்கு போகணும்னு கேட்பேன்னு நினைச்சீங்களா..” என்று கேட்கவும் அவனோ முழித்தான்.
“சோ.. துரை அப்படி தான் நெனச்சுருக்கீங்க என்ன”
“இல்ல இமை அது வந்து.. நம்ம முதல் படம் வெற்றிக்கான பார்ட்டி இது.. என் மாமாக்கு திதி கொடுக்க நீ இருக்கணும்னு கூட அவசியம் இல்ல.. அதனால யோசிச்சேன்” என்று கூற அவளோ அவனின் காதைப் பிடித்து திருகி,
“ஹெலோ.. நான் உங்க மனைவி மட்டும் கிடையாது.. இந்த வீட்டோட மருமக.. அது நியாபகம் இருக்கட்டும்.. ஆனா நீங்க என்னைப் புரிஞ்சுக்கவே இல்ல இளா.. எப்படி அப்படி நினைச்சீங்க.. எப்போ தான் புரிஞ்சுக்க போறீங்களோ..” என்றவள் கண்கள் கலங்க அவளின் கன்னத்தை ஏந்தியவன்,
“சாரி டி பச்சைமிளகா.. உன் மனசுல இருக்க ஆசைக்கும் மதிப்பு கொடுக்கணுமேன்னு தான் யோசிச்சேன்.. உன்ன சுயநலவாதியா நான் நினைக்கல.. நீ சொல்ற மாதிரி நான் இன்னும் உன்ன முழுசா புரிஞ்சுக்கல தான்.. நான்னு இல்ல முக்காவாசி ஆண்கள் அவங்க மனைவியை முழுசா புரிஞ்சுக்க முடியாம தான் போறாங்க.. பெண் என்பவள் புத்தகம் மாதிரி.. அதை முழுசா படிச்ச ஆண் எவனுமே இல்ல.. நீ போன மாசம் சம்மதிச்ச மாதிரி மறுபடியும் சம்மதிச்சா நான் மறுபடியும் முழுசா படிக்க ட்ரை பண்றேன்” என்றவன் கண்ணடிக்க அவன் கூறும் அர்த்தம் புரிந்தவள் அவனைத் தள்ளிவிட்டு,
“எங்க ஆரம்பிச்ச பேச்சு எங்க வந்து நிக்குது பாருங்க.. போய் நாளைக்கு என்ன ஆகணுமோ அதுக்கு ஏற்பாடு பண்ணுங்க..” என்றவள் சிவந்த முகத்தை மறைக்க எண்ணி திரும்பி நின்று கூற அவனோ,
“அதெல்லாம் நான் பண்ணிடுவேன்.. நாம இன்னைக்கு நைட்டு….” என்று இழுக்க அவளோ,
“உங்கள..” என்றவள் கையில் கிடைத்த தலையணையை எடுத்து அவன் மீது வீச,
“கொலைகாரி.. நல்லவேளை உன் கைல பில்லோ கிடைச்சுது.. வேற எது கிடைச்சுருந்தா என் நிலைமை என்ன ஆகுறது” என்று புலம்பியவன் அறையை விட்டு வெளியேறி இருந்தான்.
இவர்களின் திருமணம் முடிந்த சில நாட்களில் தொடங்கிய படப்பிடிப்பு ஏனோ சிலபல காரணங்களால் தடைப்பட இரண்டு மாதங்களுக்கு முன்பு தான் படம் வெளியாகி இருந்தது. பெண்ணின் ஒருதலைக் காதல் உணர்வை மிக கச்சிதமாக படத்தில் வெளிக்கொணர்ந்த காரணத்தால் ரசிகர்களிடையே பலத்த வரவேற்பைப் பெற்றிருந்தது. இவ்வாறு இவர்களின் வாழ்க்கை காதல், புரிதல், அவ்வப்போது செல்ல சண்டைகள் என தெளிந்த நீரோடையாய் சென்று கொண்டிருந்தது.
மறுநாள் பொழுது விடிய அனைவரும் ராமேஸ்வரம் செல்ல ஆயத்தமாகி கொண்டிருக்க அங்கு வந்து சேர்ந்தனர் அறிவும் இனியாவும் தங்கள் ஒரு வயது மகன் பிரபஞ்சனுடன். ஆம் அறிவு மற்றும் இனியாவிற்கு அவர்களின் காதல் சின்னமாய் போன வருடம் ஆண் குழந்தை பிறந்திருக்க அவனுக்கு “பிரபஞ்சன்” என்று பெயர்சூட்டியிருந்தனர். அறிவு மற்றும் இனியாவைக் கண்ட விழியோ,
“வாங்க மாம்ஸ்.. வா டி.. கொடு என் செல்லத்தை” என்றவள் பிரபஞ்சனை வாங்கி கொஞ்ச ஆரம்பித்தாள். விழியைத் தொடர்ந்து மாறன், மது மற்றும் மதுரனும் வர மதுரனோ,
“வா மச்சான்.. வா இனியா.. என்ன டா என் மருமகன் என்ன சொல்றான்..” என்று கேட்க அறிவோ,
“வேறென்ன கேட்க போறான்.. ஜோடிக்கு ஒரு பொண்ணும் கூட விளையாட தம்பி பாபா இல்லான தங்கச்சி பாப்பாவும் தான் கேட்குறான்” என்றுவிட்டு மதுரன் மற்றும் மாறனைப் பார்க்க அவர்கள் இருவரும் தங்கள் மனைவியைப் பார்க்க இருவரும் வெட்கத்தில் தலைக் குனிந்தனர். அப்பொழுது இனியாவோ,
“டேய் மகனே.. இதுங்க ரெண்டும் வெட்கப்படுறத பார்த்தா கூடிய சீக்கிரம் நீ கேட்டது கிடைக்க போகுது போலயே” என்று தன் மகனிடம் கூறுவது போல் தன் தோழியையும் தங்கையையும் கலாய்க்க அப்பொழுது பெரியவர்கள் வந்து சேர்ந்தனர். பிறகு அனைவரும் கிளம்பி ராமேஸ்வரம் சென்று வசீகரன் மற்றும் பானு இருவருக்கும் மகன் என்ற முறையில் மதுரன் திதி கொடுத்து முடித்தான். சடங்குகள் முடிந்து அனைவரும் இறந்தவர்களைப் பிராத்தித்தனர்.
அப்பொழுது இரண்டு பெண்கள் வாந்தியெடுக்கும் குரல் கேட்க அனைவரும் திரும்பி பார்க்க மதுரிகாவும் விழியும் தான் வாந்தியெடுத்து கொண்டிருந்தனர். மதுரனும் மாறனும் தங்கள் மனைவியைப் பக்கபலமாக பிடித்து கொள்ள கமலாவோ அருகில் வந்து இருவரது நாடிதுடிப்பையும் பரிசோதிக்க அவரின் முகமலர்ச்சி அங்கு அனைவர்க்கும் நல்ல செய்தியைக் கூறியது.
“அடடே உடனே பெரியவங்க ஆசீர்வாதம் பண்ணிட்டாங்களே.. இனிமே சந்தோஷம் தான்” என்க அதே மகிழ்வோடு இரு பெண்களும் அருகிலிருந்த மருத்துவமனையில் பரிசோதிக்க மருத்துவரும் இருவரும் கர்ப்பமாக இருப்பதாக உறுதி செய்தார். இனியாவோ,
“டேய் மகனே.. நீ கேட்ட மாதிரி உனக்கு ஜோடியும் தம்பி பாப்பாவும் வர போகுது” என்க அனைவருக்கும் மகிழ்ச்சியே.
மதுரனும் மாறனும் தத்தம் இணைகளைத் தாங்கு தாங்கு என்று தாங்க பத்து மாதங்களும் பாச மழையிலும் அக்கறைப் புயலிலும் சிக்கித் தவித்தனர் பெண்கள். அதிலும் மதுரிகா கருத்தரித்துள்ளது இரட்டை சிசு என்றறிந்த கணம் குடும்பமே மகிழ்ச்சியில் திளைத்தது. ஒருவழியாக பத்து மாதங்கள் நிறைவடைந்த நேரம் பெண்கள் இருவருக்கு ஒரே நேரத்தில் பிரசவ வலி ஏற்பட இருவரையும் அழைத்து கொண்டு மொத்த குடும்பமும் மருத்துவமனை செல்ல இருவரும் அவசர பிரிவில் அனுமதிக்கப்பட்டனர்.
சில மணிநேர போராட்டத்திற்கு பிறகு இருவருக்கும் குழந்தை பிறந்தது. மதுரிகாவிற்கு மதுமாறன் போன்றே ஒரு பெண் மற்றும் ஒரு ஆணாக இரட்டை குழந்தையும் விழிக்கு ஒரு பெண் குழந்தையும் பிறக்க அனைவருக்கும் மனது நிறைந்தது. மதுவோ,
“டேய் மாறா.. பரவாயில்லையே என் புள்ளைக்கு ஜோடியா ஒரு புள்ள பெத்துட்ட..” என்க இனியாவோ,
“நீ மட்டும் என்னவாம்.. என் புள்ளைக்கு ஜோடியா பெத்துட்ட தான” என்று கேட்டு சிரிக்க அங்கு மகிழ்ச்சி நிறைந்தது. பதினோரு நாட்கள் கழிய குழந்தைக்கு பெயர் சூட்டும் விழா நடத்தப்பட்டது.
மூன்று குழந்தைகளும் தொட்டிலில் அழகாய் படுத்து தன் போக்கை வாய் திறந்து சிரித்து கொண்டிருக்க சிறிது நேரத்தில் நல்ல நேரம் ஆரம்பமாக மதுரன் மதுரிக்காவின் பெண் குழந்தைக்கு “பிரைவெண்பா” எனவும் ஆண் குழந்தைக்கு “தமிழின்பன்” எனவும் பெயர் சூட்ட இளமாறன் மற்றும் விழியின் பெண் குழந்தைக்கு “தளிர்நிலா” என்றும் பெயர் சூட்டினர்.
பெரியவர்கள் அனைவரும் பேசி சிரித்து மகிழ்ந்தபடி இருக்க அவர்களின் கூற்றை எல்லாம் காதில் வாங்காத பிரபஞ்சனோ ஒரு கையில் தன் தங்கை தளிர்நிலா கைவிரலையும் மறுகையில் தன் அத்தை மகள் பிறைவெண்பா கைவிரலையும் பிடித்து கொண்டு பார்க்க மதுரனோ,
“டேய் உன் பையன் உன்னைவிட வேகமா இருக்கான்… ஆனா இப்போவே என் பையன கழட்டிவிட்டுட்டான்.. ” என்று கூறி சிரிக்க அறிவோ,
“டேய் மச்சான்…” என்று இழுக்க மதுரனோ,
“எனக்கே இழுவையா.. சொல்லும் சொல்லி தொலையும்” என்க,
“டேய் மச்சான்.. புலிக்கு பிறந்தது பூனையாகுமா” என்று கேட்டவன் தன் மீசையைப் பெருமிதத்துடன் நீவிக் கொள்ள மதுரனோ,
“புலிக்கு பிறந்தது பூனையாகாது தான்.. ஆனா இங்க பூனைக்கு பிறந்தது புலியாகிடுச்சேன்னு தான் கேக்குறேன்..” என்று சிரிக்க சபை முழுவதும் சிரிப்பு ஒலி தான்.
“என்ன டா சொல்ற நீயு.. குடும்பத்துக்குள்ள குழப்படி உண்டு பண்ணிருவ போலயே..” என்று அறிவு கேட்க மாறனோ,
“சகல.. மச்சான் என்ன சொல்றான்னா.. இனியா உன் வாழ்க்கையில வரதுக்கு முன்னாடி பொண்ணுங்கள பார்த்து பயந்தவன் தான டா நீயு.. அப்படின்னு கேக்குறான்.. என்ன மதுரா.. ” என்று கேட்டு சிரிக்க,
“கரெக்ட்டா சொன்ன மச்சான்..” என்று மதுரன் அவனுடன் சேர்த்துக்கொள்ள,
“ஒன்னு கூடிட்டாங்கய்யா.. மச்சானும் மாப்பிள்ளையும் இப்படி சபைல வச்சு மானத்தை வாங்குறானுங்களே.. அன்பு வேற காரி துப்புவாளே” என்ற பீதியுடன் அவளைப் பார்க்க அவளோ அவன் நினைத்ததை செய்து முடித்தாள். இவ்வாறு நடப்பதை எல்லாம் சிரிப்புடன் பார்த்த அனைவரும் தங்களின் அடுத்த சந்ததியின் உறவு வளர தொடங்கியதை எண்ணி அகமகிழ்ந்தனர்..
—சுபம்—