24. பிறைதேடும் இரவிலே

பிறை -24

தனியறையில் எத்தனை நேரம் தான் படுத்திருப்பது.. ஒரு அளவிற்கு மேல் அவளால் அந்த நான்கு சுவற்றுக்குள் இருக்க முடியாமல், மெதுவாக எழுந்து வெளியே வர முயற்சி செய்து கொண்டிருந்தாள் பிறை.

படுக்கையில் இருப்பதால் லெகுவான ஆடைகளை அணிந்திருந்தாள். அதனால் இந்த உடையோடு எப்படி வெளியே செல்வது, அப்படியே சென்றாலும் வெளியே யார் யார் இருக்கிறார்கள் என அவளுக்கு தெரியவில்லை .

‘ ப்ச் அம்மா எங்க போனாங்கன்னு தெரியல.. கடவுளே ‘ என புலம்பிக் கொண்டிருக்க.. அறைக்குள் வந்திருந்தார் மீனாட்சி.

கையில் பீட்ரூட் ஜுஸ் அவளை வரவேற்றுக் கொண்டிருந்தது.

” வாங்க ஆண்டி.. ” புன்னகை முகத்துடன் அழைத்தாள் பிறை.

” அதுசரி நேத்து அம்மா, இன்னைக்கு ஆண்டி.. நாளைக்கு என்ன ” என சிரித்தார் மீனாட்சி.

” அது … ” என தடுமாறிய பிறையை பார்த்து சிரித்தவர்.. ” உனக்கு எப்படி கூப்பிட தோணுதோ.. அப்படியே கூப்பிடு .. முதல்ல இத குடி ..பீட்ரூட் ஜுஸ் ” என கையில் கொடுக்க.. அவளது முகமே மாறிப்போனது.

” நல்லது கொடுத்தாலே இந்த காலத்து பிள்ளைகளுக்கு மூஞ்சி இப்படி போயிடுது . இதையெல்லாம் குடிச்சா தான் எங்க வயசு வரும் போது தெம்பா இருக்க முடியும்.. இப்போதைக்கு குடி.. இதுக்கு அப்பறம் தினமும் ஒரு ஜுஸ் கொடுத்து ஒரு வருஷத்துல உன் உடம்பை தேத்துறேன் ” என மீனாட்சி கற்பனை கதையை கூறி விட..

” என்னது ஒரு வருஷமா ” என புரியாமல் கேட்டாள் பிறை.

அதில் சுதாரித்து விட்ட மீனாட்சி.. ” அது நான் பார்கவியை அப்படி தான் மா சரி பண்ணேன்.. அதான் அப்படியே ஒரு புளோல சொல்லிட்டேன் ” என சுதாரித்து கொண்டார் மீனாட்சி.

அவருக்கு புன்னகையை பதிலாக கொடுத்தவள்.. அவர் கொண்டு வந்த ஜூசை எடுத்து குடித்திருந்தாள்.

” ம்ம் டேஸ்ட்டா தான் இருக்கு. பீட்ரூட் ஜுஸ் இப்படி இருக்கும்னு எனக்கு இப்பதான் தெரியும் ஆண்டி.. ”

” எதுவுமே மனசுக்கு பிடிச்சு செஞ்சா சுவையா தான் இருக்கும். உனக்கு சமைக்க தெரியுமா ” என்றதும்.. அவள் திரு திருவென விழிக்க..

” தெரியாதா.. ஒன்னும் பிரச்சனை இல்ல.. பொறுமையா சொல்லி தரேன்.. அதுவரைக்கும் நீ என் பையனை கவனிச்சு கிட்டாளே போதும். அதான் சமைக்க நான் இருக்கேன்ல ” மீண்டும் உலரி விட்டு, பிறையின் முகத்தை பார்த்து சங்கடமாக சிரித்தவர்.. கையில் இருந்த காலி கப்பை வாங்கிக் கொண்டு அறையில் இருந்து வெளியேறி இருந்தார்.

” ஐயோ இப்படியா போய் பேசுவேன்.. என்ன நினைக்கும் அந்த பொண்ணு.. என் வாய்ல எதுவும் இருக்க மாட்டேங்குது.. ” என தலையில் அடித்துக் கொண்டவர்.. மீதம் உள்ள வேலைகளை பார்க்க தொடங்கி விட்டார்.

அறைக்குள் இருந்த பிறைக்கு குழப்பமாக இருந்தது. ‘ எதுக்கு இந்த ஆண்டி இப்போ இப்படி பேசிட்டு போறாங்க.. நான் ஏன் அவங்க பையனை பார்த்துக்கனும்.. என்னத்தான் நடக்குது இந்த வீட்ல ‘ என அவள் குழம்பிக் கொண்டிருக்கும் பொழுது உள்ளே வந்தார் சிவகாமி.

” என்ன மா எந்திரிச்சு உட்கார்ந்திருக்க.. எதுவும் வேணுமா டா.. ”

” இல்ல மா …இப்போதான் ஆண்டி வந்து பீட்ரூட் ஜுஸ் கொடுத்துட்டு போனாங்க.. ”

” ஓ .. தங்கமான மனுஷங்க மா.. கிராமத்துல தான் இப்படி ஆளுங்களை பார்க்க முடியும்னு நினைச்சேன்.. ஆனால் இந்த ஊர்ல கூட இந்த மாதிரி நல்ல மனுஷங்க இருக்கத்தான் செய்யுறாங்க ”

” ம்ம் ஆமா அந்த ஆண்டி அப்பறம் அந்த அங்கில் ரெண்டு பேருமே நல்லவங்க ”

” இந்த மாதிரி ஒரு நல்லவங்க கிட்ட உன்னைய ஒப்படைக்க தான் நானும் முயற்சி பண்ணுறேன். என்ன உன் அத்தகாரி விட மாட்டா போல .. ஆனால் உன் வாழ்க்கைக்காக நான் போராட தான் போறேன் ” என்ற அன்னையை புரியாது பார்த்தாள் பிறை.

” என்ன மா புதுசா என்ன என்னமோ பேசுறீங்க ”

” நீ சொல்லு பிறை.. உன் அத்தை பசங்களை உனக்கு கட்டிக்க விருப்பமா ” என்றதும் அதிர்ந்தவள்..

” என்ன விட சின்ன பசங்க மா .. நான் எப்படி ”

” அது மட்டும் தான் காரணமா.. அப்போ உன் அத்தை வீட்ல மருமகளா போறதுக்கு உனக்கு இஷ்டமா ” என்றதும்.. சட்டென மறுத்தவள்.. ” நீங்க பட்டதே போதும் மா.. இதுல நான் வேற அங்க போகனுமா ”

” ம்ம் அதான் நானும் நினைச்சேன் டி.. ஆனால் உன் அப்பா, அவங்க தங்கச்சி பையனுக்கு உன்னைய கொடுக்க பேசுறாரு ”

” என்கிட்ட கேட்காம அப்பா எப்படி மா அப்படி பண்ண முடியும் ”

” உங்க அப்பா உனக்கு வெளிய தான் மாப்பிள்ளை பார்த்துகிட்டு இருக்காரு.. ஒரு சம்மந்தம் கூட முடியுற அளவுக்கு வந்துச்சு.. நீ ஊருக்கு வந்ததும்.. உனக்கு பையனை பிடிச்சிருந்தா கல்யாணம் வைக்கலாம்னு இருந்தோம்.. ஆனால் அதுக்குள்ள என்னமோ நடந்து போச்சு மா ”

” இப்போதைக்கு கல்யாணம் எல்லாம் வேண்டாம் மா ”

” இப்போ அந்த பையனும் இந்த கல்யாணம் வேணாம்னு சொல்லிடாராம் ”

” ஏன் மா ”

வெகுவாக தயங்கியவர்.. ” நியூஸ்ல வந்த விஷயத்தை பத்தி தான்.. ஊர்ல பேசிட்டு இருக்காங்களாம்.. அதுனால இந்த கல்யாணம் வேண்டாம்னு சொல்லிட்டாங்க.. இதை சாக்கா வச்சு.. ஏன் பையனுக்கு உன் பொண்ணை கட்டி கொடுன்னு உங்க அத்தை, உன் அப்பாட்ட பேச்சு வார்த்தை நடத்திட்டு இருக்கு.. ”

சிவகாமி கூறிய பதிலில் சற்றே மனம் வலித்து போனவள்.. ” விடுமா.. நான் தலை ஆட்டுனா தானே கல்யாணம் ”

” அந்த நம்பிக்கையில தான் நானும் இருக்கேன் பிறை.. தயவுசெஞ்சு உன் அப்பாவுக்காகன்னு உன் வாழ்க்கையை பணயம் வச்சுடாத டி.. அவரு இன்னும் இருபது வருஷமோ பத்து வருஷமோ.. யாரு ஆயிசும் யாருக்கும் தெரியாது. உனக்கு இனிமே வாழ்க்கை இருக்கு.. புரிஞ்சு நடந்துக்க.. ” தாய்க்கு  உண்டான தவிப்பு அவரது முகத்தில் தெளிவாக தெரிந்தது. அவர் மாட்டிக் கொண்டதை போல.. அவரது மகள் மாட்டிக் கொள்ளக் கூடாது என்பதில் தெளிவாக இருந்தார் சிவகாமி.

” என்ன மா யோசிக்கிற .. எதுவும் நடக்காது நீ பயப்படாத ” தாய்க்கு தைரியம் கூறினாள் பிறை.

” அதில்லை டி.. மீனாட்சி வந்து எங்ககிட்ட ஒரு விஷயம் பேசுனாங்க”

” என்ன மா ”

” அது அவங்க மகனுக்கு உன்ன பொண்ணு கேட்குறாங்க..  ” என்றதும் வெகுவாக அதிர்ந்தவள்..

” என்ன மா சொல்லுறீங்க ”

” ஆனால் உங்களை கட்டாயபடுத்தல .. யோசிச்சு சொல்லுங்கன்னு சொன்னாங்க .. எனக்கு என்ன தோணுதுனா, உன் அத்தகாரி வீட்ல வாக்கப்பட்டு போறதுக்கு.. இவங்க வீட்ல கல்யாணம் பண்ணிக்கிட்டு வந்துடலாம் ” என்றதும்.. தாயின் கற்பனையை எண்ணி தலையில் அடித்துக் கொண்டவள்..

” மா.. அந்த மாதிரி எதுவும் மீனாட்சி ஆண்டி கிட்ட பேசி வச்சிடாதீங்க.. நமக்கு எல்லாம் இந்த ஊர் செட் ஆகாது.. இந்த பேச்சை இதோட விடுங்க ” என சட்டென மறுத்த மகளை ஏமாற்றமாக பார்த்தவர்.. ” சரி நீ ரெஸ்ட் எடு நான் அப்பறம் வரேன் டா ” என வெளியேறி இருந்தார் சிவகாமி.

‘ திடீர்னு எப்படி மீனாட்சி ஆண்டி இப்படி கேட்பாங்க.. எல்லாத்துக்கு காரணம் இந்த கமிஷனர் தான்.. ‘ பல்லைக் கடித்தாள்.

அறையில் இருந்து வெளியேற விரும்பி மெதுவாக எழுந்து அறைக் கதவில் கை வைக்க.. அப்பக்கம் இருந்து யாரோ திறந்ததில் நிலை  தடுமாறி பின்னால் சாயப் போனவளை, அடுத்த நொடி உள்ளே வந்து அவளை தாங்கி இருந்தான் ஆதிதேவ் ஆருத்ரன்.

விழுக போனதை விட.. அவன்  பிடித்தது தான் அத்தனை அதிர்ச்சியாக இருந்தது.

” என்ன மூன்… தனியா வாக்கிங் போக டிரை பண்ணுறியா என்ன ?” நக்கலாக கேட்டுக் கொண்டே அவளை தூக்கி நிறுத்தினான் ஆதி.

அதில் அவனை முறைத்து வைத்தவள்… மீண்டும் அமைதியாக மெத்தையில் அமர்ந்து விட்டாள்.

” என்ன மேடம் .. அமைதியா இருந்தா என்ன அர்த்தம்..”

” நீங்க பண்ணுறது எதுவும் சரியில்லைன்னு அர்த்தம் .. ” சட்டென பேசி விட்டாள். கமிஷனரிடம் பேச தைரியம் வந்ததோ !

புருவத்தை சுருக்கியவன்.. ” என்ன பிரச்சனை ” சட்டென மாறிய அவனது முகத்தை பார்க்க தைரியமின்றி.. அவனை பார்க்காமல்.. ” நீங்களா எல்லா விஷத்தையும் முடிவு பண்ணா எப்படி.. என் கல்யாணத்தை பத்தி நான்தானே முடிவு பண்ணனும்..”

” இப்போ யார் முடிவு பண்ணா ” புரியாமல் கேட்டான் ஆதி.

” எதுவும் தெரியாத மாதிரி பேசாதீங்க சார்.. நீங்க உங்க வீட்ல சொல்லாம தான் உங்க அம்மா வந்து என் அம்மா அப்பாகிட்ட  பொண்ணு கேட்டாங்களா.. என் கல்யாணத்தை பத்தி முடிவு பண்ண நீங்க யார் சார்.. நியூஸ்ல வந்துதுனால எனக்கு கல்யாணம் நடக்காதுன்னு வாழ்க்கை கொடுக்க பார்க்கிறீங்களா.. அப்படி எந்த அவசியமும் இல்ல.. எனக்கு என் வாழ்க்கையை எப்படி வாழனும்னு தெரியும்.. நீங்க தேவையில்லாம என் வழியில வராம இருங்க போதும் ” படபடவென ஒரே மூச்சில் பேசி விட்டவளுக்கு, தற்போது தான் அவனது நிலையை நினைத்து பயம் பிடித்தது.

அவனை நிமிர்ந்து பார்க்கவே அத்தனை பயமாய் இருக்க.. தலையை குனிந்து கொண்டு அமர்ந்திருந்தாள்.

” பேசி முடிச்சிட்டியா ” குரலில் இருந்த இறுக்கம் அவனது மனநிலையை அவளுக்கு தெளிவாக எடுத்துக் காட்ட.. பயத்தில் உடல் நடுக்கம் எடுத்தது.

மெல்ல அவளை நெருங்கி வந்தவன்.. சற்றே அவளது முகத்தின் அருகே குனிந்து.. ஒற்றை விரலால் அவளது நாடியை பிடித்து தூக்கி, அவனது முகத்தை பார்க்க செய்தவன்.. ” இதுவரைக்கும் அப்படி ஒரு எண்ணம் இல்ல மூன்.. ஆனால்… ” என சற்றே நிறுத்தி அவளது பிறை முகத்தை பார்த்து, காதோரம் உள்ள முடிகளை ஒதுக்கி விட்டவன்..

” நீயே வந்து என்னைய கல்யாணம் பண்ணிக்கோங்கன்னு என்கிட்ட கேட்க வைப்பேன் மூன்.. ம்ம் .. கேட்ப தானே.. கேட்கனும்… கேட்டே ஆகனும்… கேட்க வைப்பேன் ” என்றவனது குரலில் இருந்தது கோபமா, அழுத்தமா என கண்டு கொள்ள முடியவில்லை அவளுக்கு.

அதிர்ந்து போய் அவனை பார்த்தவளுக்கு பதிலாக நக்கல் சிரிப்பை உதிர்த்தவன்.. ” சும்மா இருந்த என்னைய இப்படி சொரிஞ்சு விட்டியே மூன்.. இனிமே வர எபிசோட்ல ஆதியோட ரொமான்டிக் பார்ட்டும் பார்க்கலாம் போலையே.. காதல் இல்லாம கல்யாணம்.. இதுவும் நல்லாதானே இருக்கு.. லெட்ஸ் டிரை ” என அவளிடம் இருந்து விலகி வெளியே சென்றிருந்தான் ஆதி.

காதல் இல்லையாம்! காதல் இல்லாத திருமணமாம்! ஆதியின் மனசாட்சி நகைத்துக் கொண்டது.

அரண்டு போய் அமர்ந்திருந்தாள் பிறை. தேவையில்லாமல் அவனிடம் பேசி வம்பை வளர்த்துக் கொண்டோமோ.. காலம் கடந்த ஞான உதயம் !

சனா💖