சுவையோடு சுவடு – பா.மாரிமுத்து

பாத்திரக்கலையை 

கையிலெடுத்தேன் பெண்ணியம் பேசி சுதந்திரமளிக்க – என் கைப்பட்டு சிதறிய பாத்திரங்களோ பத்திரமாய் அவளிடம் சென்று குறைகூறியது என் சமையல் கலையை !

முந்திக்கொண்டு சமைப்பவளை மறித்து முந்தானையில் முகமறைத்து நான் கற்ற கலையெப்படி வீணாகக்கூடும் !

அன்னமளவு அறிந்திடாது – நான் வடித்த சாதத்தைக்காட்டி வசவு வாங்குமுன்னே முந்திக்கொண்டு சாதனையென்று என்னை நானே கள்வனாக்கி காட்டினேன் !

ரசம் வைத்த சாதனையில் உணர்வில்லா பலரது முகத்தில் நவரசமும் நாட்டியமாட நளினநடைக் கண்டேன் !

அறுத்தெடுத்த கோழி 

அழகழகாய் பாத்திரத்தில் நிறைந்திருக்க – மீனாய் துள்ளி துள்ளாட்டம் போட்டது என் கைவரிசையில் சிக்கியதால் !

கண்ணாமூச்சி கண்கட்டு வித்தையாக 

உப்பும் காரமும் கரைந்து விளையாட விதி வசத்தில் வென்றேன் – நான் சமையலறை மந்திரத்தில் வென்ற முதல் ஆடவனாக பெருமைக்கொண்டேன் என்னவள் முன்னே !